Akisuanerit Festival: Julie Berthelsen Nuummukalerpoq
Akisuanerit Festival ukiamut ingerlanneqarpat tusarnaartitsinerit nuannerluinnartut ingerlanneqarnissaat naatsorsuutigineqarsinnaalereerpoq.
Tusarnaartitsinernik nuannarisaqartut Akisuanerit Festivalimut qilanaarsinnaalereerput. Festivalertoqarnissaanut qaammatit suli arfineq-pingasuugaluartut, aaqqissuisut piareersaalereerput. Ilisarnartut arlallit appissamaalereerput.
Tusarnaartitsisussat ilaat saqqummiunneqareersoq tassaavoq erinarsortartoq Julie Berthelsen.
- Julie (Berthelsen, red.) Akisuanerit Festivalimi tusarnaartitsinissaminut qilanaarpoq. Aperigatsigu ingerlaannarluni akuersivoq. Peqataarusummat tulluusimaarpugut nuannaarlutalu, Akisuanerit Festivalimi aaqqissuisoq, Christian K. Elsner Sermitsiaq.AG-mut oqaluttuarpoq.
Akisuanerit Festival oktobarip sisamaaniit arferngat ilanngullugu ingerlanneqassaaq. Piffissamilu tassani erinarsortartoq Kalaallit Nunaanni tusarnaartitsisaqattaartussaammat, aaqqissuisuusut peqataarusunnersoq aperisimavaat.
Akisuanerit Festival, maanna nuannarineqarluartoq, 2008-mi ingerlanneqaqqaarmat Julie Berthelsen tusarnaartitsisunut ilaavoq. Christian K. Elsner Sermitsiaq.AG-mut ilisimatitsivoq ukiut aqqanillit qaangiunneranni tusarnaartitseqataanissaa inissaminiilluinnartoq.
- Qallunaat Nunaanni nuannarineqarluartunik kalaallisuunillu appissaaq, tusarnaariartussat erinarsoqataanissaminnut qilanaarsinnaalereerput, Christian K. Elsner oqarpoq.
Grand Priximiit Akisuanerinut
Julie Berthelsen, maanna 39-nik ukioqartoq, ukioq manna ukiuni 15-ini erinarsortartooreerpoq. Danmarkilu sinnerlugu Melodi Grand Priximi peqataassagunartoq ilisimatitsissutigineqareerluni.
Ekstra Bladetimut januaarip 21-ani erinarsortartoq ima oqarpoq: - Oqaluuserinissaa nuannissagaluaqaaq, maannali oqaasissaqanngilanga.
Unammisussat januaarip 31-ni saqqummiunneqassapput, unamminerlu Herningimi Boxenimi februaarip 23-ani ingerlanneqassalluni.
Tusarnaartitsisussat arlallit inissereerput
Julie Berthelsenip saniatigut, Enok Poulsen aamma Ulf Fleischer Paarisa Band peqatigalugu, festivalimi tusarnaartitsissapput.
Tusarnaagassat pingasut assigiinngilluinnartuusut maanna pilersaarutiniipput. Tamassumunnga Christian K. Elsner ima nassuiaateqarpoq.
- Festivalip tamanoortuunissaa anguniartarparput. Taamaammat tusarnaagassat maannakkut assigiinngiiaarput, sulilu allanik isumaqatigiissuteqartussaalluta, Sermitsiaq.AG-mut oqarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...