EB: Julie Berthelsen Melodi Grand Prix-mi peqataassaaq
Kalaaleq erinarsortartoq Julie Berthelsen Melodi Grand Prix-mi unammeqataassasoq, Ekstra Bladetip paasivaa.
39-inik ukiulik erinarsortartoq Julie Berthelsen, Popstarsimi siornatigut peqataasimasoq, pisortatigoortumik tusagassiortunik katersortitsisoqareertinnagu suli oqaqqusaanngikkallarpoq. Tusagassiortunik katersortitsinermi qaammammi matumani pisussami, peqataasussat qulit nalunaarutigineqassapput.
Erinarsortartoq nuannarineqarluartoq Ekstra Bladetimut ima oqarpoq:
- Oqaluuserinissaa nuannissagaluaqaaq, maannali oqaasissaqanngilanga.
Erinarsortartoq pitsaalluinnartoq
Erinarsornermik unamminermi pisortaq, Danmarks Radiomi aliikkusersuinermik pisortaasoq, Jan Lagermand Lundme danskit nutaarsiassaqartitsivianut oqarpoq:
- Erinagissorujussuuvoq, aamma nuannissagaluarpoq Grand Prix-mut kalaallimik peqataatitaqarsinnaagutta, taamaattoqassanersorli februaarimi paasiumaarparput.
Unammisussat januaarip 31-ni saqqummiunneqassapput, unamminerlu Herningimi Boxenimi februaarip 23-ani ingerlanneqassalluni.