ACR-imut peqataasussat aatsaat taama amerlatigisut
Arctic Circle Race ukiuni pingasuni taamaatinneqartareerluni ukioq manna ingerlanneqaqqittussanngorpoq. Peqataaniarlutik nalunaarsimasut aatsaat taama amerlatigaat, ACR-imi siulittaasoq Jens Klaus Lennert oqarpoq.
Arctic Circle Racemut peqataaniarlutik nalunaarsimasut aatsaat taama amerlatigaat. Ujakkaarluni aallarnissamut ullut marluinnanngortut 165-it nalunaarsimalereerput, peqataasussallu kingulliit nalunaarnissaat maanna utaqqisaaginnalerpoq.
- 165-it nalunaareerput. Aningaasaliisorisimasatta peqataatitassaasa nalunaarnissaat maanna utaqqivagut. 165-ini nunanit allaneersut uagut aqqutigaluta angalanissamik piareersaassutsittut 19-iupput. Nunanit allaneersut tamarmik tikissimalereerput, Arctic Circle Racemi siulittaasoq Jens Klaus Lennert Sermitsiaq.AG-mut oqaluttuarpoq.
Kingullermi ACR-ertoqarmat 2019-imi 167-it peqataapput. ACR-imi amerlanerusut ukioq manna peqataassasut naatsorsuutigineqalereerpoq.
ACR-p Covid-19-ip tuniluunnerani ukiut pingasut kingulliit ujakkaarluni unammisitsinissani taamaatittariaqarsimavaa. ACR-imi siulittaasup nuannaarutigaa taamaatitsisariaqartarnerup soqutiginninneq minnerulersissimanngikkaa. Illuatungerluinnaanimmi pisoqarpoq:
- Nunanit allaniit sineriammiillu peqataanissamut soqutiginnittut taama amerlatiginerat nuannaarutigaarput. Nunanit allaniit uagut aqqutigaluta angalanissamik peqataanissamillu isumagineqarnissamik neqeroorutitsinnik pisiniarfissaq ukioq manna matujaartariaqarsimavarput, inissat siumoortumik inniminneriikkat nungummata, Jens Klaus Lennert oqaluttuarpoq.
Qimussit illerngi akunnermiliupput
Arctic Circle Race tallimanngornermi 31. marts nal. 10.00 aallartissaaq. Ujakkaarluni oqilaniunnermi isorartussuseq 160 kilometeriuvoq, ullullu pingasut ingerlaarfigineqassalluni.
Jens Klaus Lennert ilisimatitsivoq Avannaata Qimussersua arfininngornermi 1. april ingerlanneqalerpat immikkut upalungaarsimanermik piareersimatitaqarlutik. Qimussimmi illerngi ujakkaartut aqqutissaasa nalaanniikkumaarput.
- Sillimaniarnikkut tassuuna unammillernartoqarpoq, qimussit arfininngornermi saneqquanerisa nalaanni ujakkaarfiit aamma ingerlaarfiusussaammata. Avannaata Qimussersuanik ingerlataqartut ataatsimeeqatiginikuuagut, taamatullu pisussami upalungaarsimanikkut immikkut piareersimassalluta, Jens Klaus Lennert oqaluttuarpoq.
Taanna ilisimatitsivoq ataatsimiinnermi Avannaata Qimussersua pisarnermit akunnermik ataatsimik kingusinaarluni aallassasoq aalajangerneqartoq, ujakkaartut amerlanerpaat aqqutigineqartussamit illuareersimalerpata qimussit aatsaat saneqqussinnaaqqullugit.
Ujakkaarnissamut aputissaqarluartoq
Sisimiuni sila qaammatip kingulliup ingerlanerani mannguumanerusimavoq. Jens Klaus Lennert ilisimatitsivoq maanna issileqqilaarsimasoq, silalu ujakkaarnissamut atoruminarluinnartoq. Aput aakkunnaarsimavoq, Sisimiullu ukioq manna aputaasannerugaluartoq, ujakkaartunut tamanna akornutaassanngilaq.
- Sisorarfigilluinnassaaq. Soorunami neriuutigaarput peqataasut tamarmik akornuseratik apuuffissamut apuukkumaartut. Qilanaarpugut, oqarpoq.
Arctic Circle Racemi 2019-imi Phillip Bellingham Australiameersoq ajugaavoq.