Arctic Circle Race ukiut pingajussaannik taamaatinneqarpoq
Coronap tunillaassuunnera Sisimiullu eqqaani aputaasannera pissutaallutik Arctic Circle Race ukioq manna ingerlanneqartussaq taamaatiinnarneqarpoq. Kingullermik Arctic Circle Racertoqarpoq 2019-imi.
Arctic Circle Racemi siulersuisut aalajangerput unammersuarneq ukioq manna taamaatinneqassasoq. Arctic Circle Race Facebookimini taama nalunaarpoq.
Coronavirusip nunatsinni tuniluunnerujussua aamma Sisimiut eqqaani aputaasannerujussuaq ACR 2022-mik taamaatitsinermut pissutaapput.
- Arctic Circle Race kajumissutsiminnik ikiuuttunit arlalinnit peqataaffigineqartarpoq. Tuniluunneq maannakutut ingerlaannassappat piareersarnermi ingerlatsinermilu sulisussat amigaatigineqaleratarsinnaapput. Ajornerpaamik pisoqassappat piffissaq qanillilluinnartorlu taamaatitsisariaqalertussaassaagut, ACR allappoq nangillunilu:
- Nutaarsiassaq nikallornartoq alla tassaavoq Sisimiut eqqaa maanna aputaasammat. Arctic Circle Racemi aqqutigineqartartoq ukioq manna nalinginnaasumit aputeqannginnerungaatsiarpoq.
Akiliutit utertinneqarsinnaasut
Arctic Circle Race 1.-3. april ingerlanneqartussaagaluarpoq.
Unamminissap tungaanut piareersarnerit januarimi aallartinneqartaraluarput. Kajumissutsiminnilli ikiuuttartut arlallit ilaqutaallu maanna coronamik tunillatsissimallutik anisinnaanngillat. Aamma aputaasannera pissutigalugu containerit aqqutissamilu atortut allat inissinneqartussat maanna assartorneqarsinnaanngillat, ACR-imi siulersuisut Sermitsiaq.AG-mut ilisimatitsipput.
ACR-imi siulersuisunit peqataasussatut nalunaarsimasut marlunnik periarfissinneqarput. Akiliutitik tamakkerlugit maanna tigusinnaavaat. Imaluunniit akiliutit uninngatiinnarlugit aappaagumut ACR 2023-mut peqataasussatut nalunaarsimasutut allaqqaliinnarsinnaapput.
- Neriuppugut 2023-mi takussallusi. Nukissaqarluarluta - neriullutalu aputeqarluarumaarluta - uteqqissaagut, Arctic Circle Racemi siulersuisut allapput.