Aaqqissuisuuneq innersuussivoq: Innarluutilik sumiginnarneqartoq
Hans Inuusuttoq kipiluttunartorsioppoq. Aappariit illoqarfimmut nuupput nuliaasup qaratsamigut aanaartoornermigut innarluuteqalersimasup pitsaanerusumik ikiorneqarnissaa neriuutigalugu. Neriuulli maanna qamingajavissimavoq
Maanna Ikerasaarsummiup Nukaaraq Inuusuttup qaratsamigut aanaartorneraniit ukiup affaa qaangiuppoq. Pisimasumi tassani arnaq 52-nik ukiulik timimi affaani talerperlermi nukillaarpoq, sulisinnaajunnaarlunilu.
Saniatigut ataqqinarnerusumik inuunissamut ilungersorneq aallartippoq. Uiatali Hans Inuusuttup 53-inik ukiullip paasilertorpaa ataqqinassuseqarnissamut ilungersuuteqarani inuuinnarniartariaqartorli.
Hansimmi ilimagisimasaatut Kommune Qeqertalik ikiuussinnaassuseqanngilaq, inissisimanerat eqqarsaatigalugu.
Aappariit decembarimi Qasigiannguani panimminni juullisioriartortillutik aalajangerput nakorsanik ikiorneqarnissamut qaninnerusumut illoqarfimmut nuuinniarlutik.
- Ajornannginnerulernissaa neriuutigaarput. Nakorsamut qanittumiinnissap ajornannginnerunissaanik isikkoqarpoq, Hans Inuusuttoqoqarpoq.
Aammami nakorsamut qaninneruneq ajornannginneruvoq, qaammatini marlussunni Qasigiannguaneereerluni inerniliivoq.
Toqqissisimaneq qimallugu
Ajornartorsiut Kommune Qeqertalimmiippoq.
- Qeqertalimmi isumaginninnermut allattoqarfimmit paasineqarnissaq ilumut ajornakusoorpoq, inuit tassanngaannaq innarluuteqalersut pineqartillugit.
- Kommunip sulinera kigaatsuararsuuvoq, sulinerminnilu sumut killissimanerup paasiniarnera kingaatsupilussuusarpoq, allaanani nalugaat innarluuteqarnermut inatsimmi nutaami ukiup aallartinnerani atuutilersumi sussanerlutik, oqarpoq.
Sapinngisatsinnik iliuuseqarniarsaraagut
Hans Inuusuttup nulianilu nunaqarfimmi inuunertik ilisimalluagartik toqqissisimanartitartillu qimappaat illoqarfimmi ”oqinnerusumik” inuuneqarniarlutik. Ullumikkut utoqqaat illuani taartaasutut sulisarpoq. Aappariit isertitaqarfituaraat. Nukaararmi suli siusinaartumik suliunnaarnersiaqalersimanngilaq, naak Hansi Rigshospitalimit tikikkamilli qinnuteqaraluartoq, Danmarkimi nakorsat kajumissaarinerisigut.
- Ullut 14-ikkaarlugit akissarsiakka ullormi ataatsimi nunguttarput.
Inissaqartinneqarneq
Ullumikkut aappariit Inuusuttoq panimminni ningaaminnilu taakkulu meerai kattussimasut pingasut ilagalugit najugaqarput. Illuatungeriit namminerisaminnik inuuneqarnissaannut annikitsuararsuarmik periarfissaqarmata pitsaanngitsumik inissisimaneruvoq.
- Panitsinnit ilaqutaannillu inissiarnisaarfigineqarnerput najugaqartinneqarnerpullu qujamasuutigaarput, aammali innarluutilimmik nuliaqarluni qasunarpoq, Hans Inuusuttoq oqarpoq.
Kingumullu Kommune Qeqertalimmit tusagaqanngillat. Innarluutimmut naleqquttumik initaarnissaannik suli nalunaartoqarsimanngilaq, namminerisaminnik pigisinnaasaannik.
- Inatsit nutaaq naapertorlugu namminerisatsinnik initaarnissatsinnut pisinnaatitaavugut, Hans kommunimit oqaloqatigineqarnissani ullormik ataatsimik sioqqullugu oqarpoq, kingumut innarluuteqarnermut inatsit maluginiaqquniarlugu.
- Pimoorussamik sullinneqarnissarput atorfissaqartipparput. Kommunimillu tusaaniarneqanngilagut, oqarpoq.
Ilisimaneqartoq
Inissisimanerali nutaajunngilaq. Meeqqat mikigallarmata nulialu tarnimigut napparsimanermigut piffissap ilaani atugarliormat aamma taamatut inissisimasimavoq.
- Aappassaanik sullissinerup kigaannerujussua misillerfigaara. Taamanikkut oqarfigineqarpunga aqaguani paasitinneqassasunga. Aqagua suli takkussimanngilaq, Hans nuliami nappaataa pillugu meeqqaminut unneqqarissimasoq oqarpoq.
- Anaana makku peqqutigalugit taamaappoq. Sukkasuumik susoqarnersoq oqaluttuukkakkit peqqissiminngisaannarpunga.
- Naluara Kommune Qeqertalimmi sullissineq sooq taama kigaatsiginersoq. Meeqqat inuusuttullu siunissaraat. Pissutsit pitsaasuusariaqarput. Maannakkut taamaanngillat, allanngortoqanngippallu pitsaanngitsumik inerneqassaaq, Hans Inuusuttoq oqarpoq.
AG uani pisiariuk: