Faktaboks: Sapinngisatsinnik iliuuseqarniarsaraagut
Inissisimaffik uggornartuuvoq, taamaattorli innuttaasunut ilungersunartut Kommune Qeqertalimmit tamatigut iliuuseqarfiginiarneqapallattarput, kommunimi pisortat qullersarigallagaat Thomas Holm Jensen oqarpoq.
- Soorunami innarluutilinnut inatsisip aamma nakorsanit ilitsersuutigineqartut innuttaasup pisariaqartitaanut tunngasut malinneqarnissaat nalinginnaasumik pingaartippavut. Ilaqutariit nuukkusuppata nalinginnaasumik akuersaarniarfigisarparput. Inissiamilli piareersimasuutitaqalernissatsinnut piffissaq sivisusinnaasarpoq. Innuttaasoq taama inissisimaguni, tassa ikiorserneqarsinnaappat inissiamilu ineqarpat, piareersimasoqalernissaanut utaqqisariaqassaaq. Qasigiannguani inissiat ilaat atorunnaarnikuupput, inissiaativullu pilerngunneqartarlutik. Innuttaasut sumiluunniit najugaqaraluarpata ikiorusuppavut aamma najugarerusutaminni tapersersorneqarnissamik pisariaqartitaannik tapersersortarnissaat anguniarusuttarparput. Ilaqutariit ikiorserniarlugit piaartumik atorsinnaasumillu iliuuseqartoqartarnissaa isumaqatigiinngissutigisinnaanngilarput. Ilisimasatsitulli kommunit tamarmik innarluutilinnut inatsimmut nutaamut atatillugu arlalitsigut ilungersunartorsiortarput.
Thomas Holm Jensenip oqaatigisinnaannginnerarpaa Kommune Qeqertalimmi siusinaartumik soraarnerussutisiaqalernissamut innuttaasoq agguaqatigiissillugu qanoq sivisutigisumik utaqqisariaqartarnersoq.
- Suliassat sapinngisamik piaartumik suliarisarpavut. Uppernarsaatissanik katersinermut piffissaq qanoq sivisutigisoq atorneqartarnersoq apeqqutaasarpoq.