isiginnaartitsineq
Vivip unnuk isiginnaartitsiffia kingulleq
Isiginnaartitsinermit sivikitsumik uninngalaarnissara qilanaaraara
Novembarip aqqaneq-aappaanniilli Vivi Sørensen Odense Teaterimi isiginnaagassiaq 'Her og nu' takuteqattaalerpaa. Kisianni Odensemi unnugu naggammik isiginnaartitsissaaq, Vivi Sørensenilu naleqqulluinnartumik unikkallalaassaaq.
- Una isiginnaagassiaq taama amerlatigisunik takuteqattaarlugu soqutiginarpoq, oqaluttuaq uumassuseqartupilussuugami, ullullu tamaasa sumininnguit iluarsineqarsinnaagamik, Vivi Sørensen Sermitsiaq.AG-mut oqaluttuarpoq.
Vivi Sørensenillu isiginnaartitsisarfimmi ajunngilluinnartumik takutitsinnguatsiarpoq. Tassami isiginnaagassialerisut arlallit Vivi Sørensenip ilinniartoqatinilu isiginnaartitsineranik nuannarinipput.
Ataatsip Vivi Sørensen aamma Odensemi isiginnaartitsinermut ilinniarfimmi ilinniartoqatai aasamut naammassinissaannut nakkutigeqquai.
Atuaruk: Vivi Sørensen Odensemi isiginnaartitsisoq
Vivi Sørensen Odensemi isiginnaartitsinermut ilinniarfimmi kalaallini siullersaalluni naammassisussaq, scenemi takutitsinermut tunngatillugu misilittagartuutut imminut taasinnaalereerpoq. Takutitseqqaarnissarli sioqqutilaarlugu pissanganarnerpaasimasoq oqaluttuarpoq.
- Odensemi isiginnaartitsisarfimmiinnermi misilittaanermi sulineq misigisassartaani annerpaagunarpoq. Sulineq pitsaavoq, ilitsersuisumik suleqateqarnera nuannarilluinnarpara, isiginnaartitsisartoq oqarpoq, taana ilaatigut KNR-imi tv-kkut aallakaatitassiortutut sulinikuuvoq.
Decembarip 14-annit 17-ata tungaanut Vivi Sørensenip 'Her og nu' takuteqattaaqqissavaa. Tassani Københavnimi isiginnaariat takussavaat, tassami Vivi Sørensen Folketeaterimi isiginnaartitsissaaq.