Vivi Sørensen Odensemi isiginnaartitsisoq

Vivi Sørensenip aasap tulliani isiginnaartitsisartutut Odense Teaterimi ilinniarnini naammassissavaa. Taamaalilluni ukiuni sisamani Odensemi assoroorluni sulineq naammassissaaq. Den danske scenekunstskolemi isiginnaartitsisartunngorniarfimmi ilinniartut arfineq-pingasut, isiginnaagassiami 'Her og Nu'-mi isiginnaartitsisuupput.

Atuaruk: Isiginnaartitsinermik ilinniartoq nunasiaqartuuneq pillugu kisimiilluni suliaqartoq

Saqqummiilluni isiginnaartitsineq
Isiginnaartitsisartunngorniartut ilinniarnerminni suut ilikkarsimanerlugit takutissavaat.

Ilinniartut taakku arfineq-pingasut pisinnaasatik takutissavaat, aammalu takutitsinerup kingunerisaanik suliassaqarsinnaanissartik neriuutigissavaat. Tamannami suliffissarsiorluni qinnuteqaatitut taaneqarsinnaasarpoq.

Københavnimi, Århusimi aamma Odensimi isiginnaartitsisartunik ilinniartitsisoqartarpoq. Sumiiffimmi ataatsimi immikkut arfineq-pingasuusarlutik. Ilinniarfimmi aallartinniarneq ajornarpoq. Ukiut tamaasa 700-900 tungaanut qinnuteqartarput. Vivi Sørensen marloriarluni qinnuteqaqqaarluni iluatsitsisimavoq, Odensemi kalaallini siullersaalluni ilinnialerluni.

Ilinniarfik pitsaalluinnartoq
Vivi Sørensenip Sermitsiaq.AG-mik oqaloqateqarnermini isertuutinngilaa, marloriarluni qinnuteqarluni uteriissimanini iluatsittoq nuannaarutigalugu.

- Nammineq timitaliinissamut tunngalluinnarpoq. Ilinniarnerup ingerlanerani imminut inuttut qanoq ittuunerluni ilikkarnartupilussuuvoq. Kinaassutsitsinni ajortut ajunngitsullu pisarpagut.

- Ilikkagaqartorujussuuvunga. Ilinniartut arfineq-pingasuulluta suleqatigiinnitsinni peqatigiissimangaaratta ilikkartorujussuuvugut, Odense Teaterip cafeani nuannersumi Vivi Sørensen oqaloqatigigatsigu naggasiivoq.

Tusagassiortoq
Vivi Sørensen ukioq manna 'Spillemand på en Tagryg' Odense Teaterip isiginnaartitsisarfissuani isiginnaartitseqataaffigaa.

Taanna isiginnaartitsisartutut ilinnialinnginnermini Nunatsinni tusagassiortutut ilinniarsimasuuvoq, KNR-imilu tv-liortutut sulisimalluni.

Piumasaqaatit annertuut
Isiginnaartitsisartoq imminut kisimi sakkorisuuvoq. Ilinniarnermi piginnaasat timikkut eqqarsartaatsikkullu periarfissat assigiinngitsut ilinniarneqartarput. Aalaneq aamma soorunami oqalunneq erinarsornerlu ilinniarluarneqartarput. Ballet, piareersaqqaarani saqqummiussinermut ilinniarneq allarpassuillu.

Her og Nu
Isiginnaagassiaq tyskimit isiginnaartitsissusiortumit Roland Schimmlpgennigimit suliaavoq. Vivi Sørensenip inuttaq Ilse inuttaaffigaa, taakkulu isiginnaartitseqatinilu katittunut qaaqqusaniipput, silagissumilu nerrivimmi taakku issiapput.

Taakku qaaqqusat imminnut nalunngisariaapput. Asanninneq, pakatsineq aamma peqquserlunneq isiginnaagassiami saqqummersinneqarput. Isiginnaagassiaq Maria Kjærsgaard-Sunesenimit ilitsersuiffigineqarpoq.

Københavnimi aamma takutitsissasut
Her og Nu novembarip 12-anni takuteqqaarneqassaaq. Odense Teaterimi decembarip aallaqqaataa ilanngullugu takutinneqartassaaq. Københavnimeersut Vivi Sørensen isiginnaartitseqataalu takunissaannut periarfissaqassapput. Tassani Folketeateretimi decembarip 14-anit 17-anut takutinneqassammat.

Allaaserisap ataani assit takukkit