Video: Standing Rockimut tapersiineq

Nipilersortartup Uyarakqip qaammatini arlalinni North Dakotami uuliap aqqutissaanut ledningimut akerliusut malunnartinneqarnerat annertusiniarpaa.

Ledningi pilersaarut naapertorlugu Siouxit nunaatigoorluni aamma tatsikkut imeqarfiup ataatigoortussaagaluarpoq.

- Standing Rockimi pisut pillugit kalaallit tusagassiuutitigut malinnaanerat annikittuararsuusoq isumaqarpunga, tamannalu uanga allanngortitseqataaffigerusuppara, Uyarakq oqarpoq.

Politiit nakuusertut
Akerliusut uninngaffianni arlaleriarluni politiit tungaannit nakuusertoqarnerarlugu pasilliuteqartoqaqattaarnikuuvoq. Ilaatigut Amnesty Internationalip politiit timinik misissuisaqattaarnerat isornartorsiorpaat.

Uyarakq maanna nuusiami sisamassaat, Miseraq, saqqummerseqqammerpaa. Erinaq ataaseq Standing Rockimik atserneqarsimavoq, taassumalu videotaa saqqummiunneqaqqammerpoq. Musikvideo Standing Rockimik taaguuteqartoq, Nick Ørbæk Jacobsenimit erinarsorneqartoq Standing Rockimi filmiliortartut suleqatigalugit suliarineqarpoq.

Atuaruk: Sioux Standing Rockimi ajugaaneq persuarsiutigaat

Tapersiineq
Standing Rockimi akerliunerit Amerikami nunap inoqqaavinit taperserneqarnikuupput, taamatullu sakkutuujususimasut Standing Rockimut angalasimapput.

Kalaallit nipaat ersarinnerusumik maanna tusaaneqartariaqartoq, Uyarakq isumaqarpoq.

- Ilaqutariissuuvugut, kitaatungitsinnilu nunap inoqqaavinut attaveqarnerusariaqarpugut, Uyarakq oqarpoq.

Ajugaasut
Standing Rockimi akerliusut uuma qaammatip aallartinnerani ilaatigut ajugaapput, tassani sakkutuut aalajangerput, uuliap aqqutissaa imeqarfiup ataatiguussanngitsoq.

Aakerliusulli suli ukiukkut uninngaffimminniiginnarput, akerliuneq suli naammassinngimmat.

Uyarakqip nuusiaminit 'Miseraq'-mit isertitat tamaasa Standing Rockimi akiuunnermut tunniunniarpai.

Video Standing Rock uani ataani takuuk