uuliap akingi
Uuliap akiisa allanngortinneqarneri Vittup tunuaqquai
Naalakkersuisoq Vittus Qujaukitsoq Polaroilip akinik taama annikitsigisumik appaaniarnera pakatsissutigaa - aammalu politikkikkut aalajangigassanngortinngimmassuk
Aningaasaqarnermut, Aatsitassanut aamma Nunanut Allanut naalakkersuisoq Vittus Qujaukitsup (S), KNI-p nukissiornermut immikkoortortaqarfiata nammineerluni uuliap/dieselip, petruuliup aamma benziinap akiinik literimut 27 oorinik appaanera ajorinngitsoorfissaqartinngilaa.
Pakatsisoq
- Polaroilip ullumikkut taama annikitsigisumik appaaniarnerarluni ilimasaaruteqarnera tupaallaatigalugulu pakatsissutigaara. Uuliap akiisa aalajangersarneqarnerannut apeqqut ima pingaaruteqartigaaq minnerpaamik Naalakkersuisunut aalajangigassanngortillugu ingerlatinneqarsimasariaqarluarpoq. Aalajangerneq inuiaqatigiinnut ima annertutigisumik sunniuteqartussaasoq politikkikkut akuutitsinani aalajangerneqartariaqanngikkaluarpoq.
Vittus Qujaukitsoq Namminersorlutik Oqartussat nittartagaani taama erseqqissaavoq.
Tunuartinneqartariaqartoq
- Nunarsuarmi uuliap akiata nikerarnera eqqarsaatigalugu Polaroilip akinik nalimmassaaniarluni ilimasaaruteqarnera eqqoqqissaartuunngilaq, taamaattumillu Aningaasaqarnermut Aatsitassanut Nunanullu Allanut Naalakkersuisoq piumasaqarpoq akinik nalimmassaarinissamut ilimasaaruteqarneq tunuartinneqassasoq, aalajangernissarlu politikkikkut aalajangiivigineqaqqullugu ingerlateqqinneqassasoq, ilanngullugu oqarpoq.
Aruaruk: Ikummatissamik pisineq akikinnerulerpoq