Ikummatissamik pisineq akikinnerulerpoq

Januaarip tallimaat aallarnerfigalugu ikummatissamik pisineq akikinnerulissaaq.

Polaroilip akit 27 oorimik apparpai.

Akit nutaat
Akit apparnerisa kingorna ima isikkoqarput:

• Gasolie/diesel: literimut 6,20 koruunimiit 5,93 koruunimut appartinneqarpoq avatangiisinut akitsuut literimut 10 ooriusoq ilanngullugu.

• Petroleum: literimut 6,31 koruunimiit 6,04 koruunimut appartinneqarpoq avatangiisinut akitsuut literimut 10 ooriusoq ilanngullugu.

• Benzin: literimut 6,05 koruunimiit 5,78 koruunimut appartinneqarpoq avatangiisinut akitsuut literimut 10 ooriusoq ilanngullugu.

34 millionit koruuninik sipaartoqassaaq
Akinik appaaneq inuiaqatigiinni inoqutigiinnut ataatsimut isigalugu 2016-imi 34 millionit koruuninik aningaasartuutikillisaataassaaq.

Ukiut siuliini periuseq naapertorlugu KNI A/S Polaroil ikummatissaq 2016-imi pisiassami akii aalajangersimasumik isumaqatigiissuteqarnikkut qulakkeereersimavai; tamannalu aningaaserivissuit arlariiaat suleqatiginerisigut pisarpoq.

Akitigut isumaqatigiissutit
Akitigut isumaqatigiissutit 2016-imi ukiup siulianut sanilliullugit appasinnerummata, Polaroilip ikummatissanut akigititai appartinneqarsinnaalerput.

2014-ip ukiaata kingorna taamaalillutik akit pingajussaa appartinneqarput, katillugit literimut 72 oorinik.

2016-imi ikummatissanik Nunatsinnut eqqussuineq ukiut kingulliit marluk pisimanerattulli tallimariarluni piumaarpoq. Ikummatissaq Nunatsinnut eqqunneqartartoq kiffartuussisussaatitaanerup iluani atorneqartartoq annikilliartorpoq, maannakkut 125 millionit literit missaaniilluni, imaluunniit 2009-imi eqqunneqarsimasup 75 procentia, Polaroil ilisimatitsivoq.