avatangiisit
USA-p eqqagakui salitsinniarlugit Kim Kielsenip Løkke ilungersorfiginiarpaa
Naalagaaffeqatigiinneq pillugu Christiansømi ataatsimiinnermi sakkutooqarfiusimasuni eqqakkanik saliisoqarnissaanik Kalaallit Nunaata nutaamik Danmark ilungersorfigeqqinniarpaa.
Ministeriuneq Lars Løkke Rasmussen (V) ullumi aqagulu ukiumoortumik Kalaallit Nunaanni aamma Savalimmiuni naalakkersuisunikkut aqutsisut naalagaaffeqatigiinneq pillugu ataatsimeeqatiginerinut qaaqqusisuuvoq.
Ukioq manna Christiansømi oqaloqatigiissutigineqartussat pingaarutillit pingasunngornermut inissinneqarput, tassani Savalimmiuni lagmand, Aksel V. Johannesen, aamma Naalakkersuisut Siulittaasuat, Kim Kielsen, naalagaaffeqatigiinnerup iluani suliassanik qaqitsinissamut periarfissinneqassapput.
Ukiorpassuarni danskit ingammillu amerikamiut Kalaallit Nunaanni sakkutooqarfigisimasaat salinneqarnissaat pillugit akerleriissutit oqaloqatigiissutiginiarlugit, Kim Kielsenip siumut nalunaarutigereerpaa.
Suliaq politikkikkut akuleruffigiumaneqanngitsuuvoq. Savalimmiut qanittukkut Nunatsinni aalisarfiusimasuni saliinissamik neriorsuinerisa kingorna, aatsaat oqallisissanngoqqoppoq.
Savalimmiuni inatsisartut inatsisitigut taamaaliornissamik pisussaatitaanngikkaluarlutik tamanna pivoq.
- Savalimmiormiut kalaallit pisuussutaat inussiarnisaarnerallu Kalaallit Nunaanniinnerminni iluaqutiginikuuaat. Tunitsiviit qimakkatsigit saliinikuunnginnatta savalimmiormiunut nikanarsaatitut inissisimasut taamaammat oqaatigineqarsinnaavoq.
- Kalaallit saliissuttariaqarigut isumaqarpunga, savalimmiormiut lagmandiat, Aksel V. Johannesen, ukioq manna taama oqarpoq.
Taamatut isummerneq Chistiansømi ataatsimiinneq sioqqullugu Kim Kielsenimut sukataarutissiivoq.
- Naalakkersuisut Savalimmiunilu naalakkersuisut savalimmiormiut tunitsivitoqaanni torersaassinissamut suleqatigiilluarnerat eqqarsaatigalugu, Kalaallit Nunaanni saliinissaq pillugu Naalagaaffeqatigiit ataatsimiinneranni qaqitassama ilagaat, tusagassiuutinut nalunaarummi oqarpoq.
Ministeriunerup Lars Løkke Rasmussenip ataatsimiinneq sioqqullugu suliaq oqaaseqarfigerusunngilaa. Kisianni Folketingip Nunarput pillugu ataatsimiititaliaani siulittaasoq, attaviitsoq Aleqa Hammond oqartussaasuuguni, Løkke iliuuseqartariaqarpoq.
- Ministeriunerup naalagaaffeqatigiinneq nukittooq pimoorukkuniuk, taava avatangiisinik naleqartitsinitsinnut Danmarki akisussaaffimmik tigusisariaqaraluarpoq.
- Danmarkip aamma USA-p ikinngutigiinnerat Kalaallit Nunaata avatangiisiinut akeqartitsinera nikanarsaaneruvoq, taanna oqarpoq.
Danskit ungasinngitsukkut Kalaallit Nunaata kitaata avannaanut sakkutooqarfiusimasumut misissuiartorlugit angalangajalerput, tassani USA 1960-ikkut ingerlanerini ilaatigut sermip ataani atomreaktorimik ingerlatsinikuupput.
Aamma atuaruk: Løkkep tunngaviusumik inatsit pillugu Kielsen oqaloqatiginiarpaa