avatangiisinut politikki
Nutaarsiassaqartitsivik: Trumpip USA Parisimi silap pissusaanut isumaqatigiissutaannit anisippaa
USA silap pissusaanut isumaqatigiissummit anisoq, tusarfiit arlallit amerikamiut nutaarsiassaqartitsivianut Axios-imut oqaatigaat
USA-p Parisimi silap pissusaanut isumaqatigiissutaannit aninissaa aalajangiullugu, USA-p præsidentiata Donald Trumpip nalunaarutigaa. Tuluit nutaarsiassaqartitsiviat Reuters, nutaarsiassaqartitsivik alla Axios innersuussutigalugu taama allaaserisaqarpoq.
Tv-kkut nutaarsiassaqartitsiviup CBS-ip Det Hvide Hus-imi tusarfiit innersuussutigalugu taamatuttaaq, USA-p isumaqatigiissummit anisoq nalunaarutigaat.
Paasissutissat suli pisortatigoortumik uppernarsarneqarsimanngillat, taamaammat energi-, klima- aamma forsyningsministerip Lars Christian Lilleholtip (V) suliaq oqaaseqarfigerusunngikkallarpaa.
Amerikamiut isumaqatigiissummit aninissaanut aalajangernerup immikkuualuttortai, Trumpip aqutsisoqarfiani atorfilinnit aalajangiiffigineqaleruttortut tusarfiit oqaatigaat.
USA-p Parisimi isumaqatigiissummut peqataanissaanut Obamap præsidentiunerata nalaani aalajangerneqartoq taamaasilluni qatangiinnartinneqarpoq, isumaqatigiissutigineqartut USA-mit malinneqarnissaannut Obamap atsioqataanera taamaatiinnarneqartussanngorlutik.
Silaannaap annerpaamik 1,5 aamma 2 gradit akornanni ukiuni tulliuttuni qaffakkiartornissaa Parisimi isumaqatigiissummi anguniarneqarpoq. Taamatulli isumaqatigiissusiortoqarnera naammaqqajanngilaq, inatsisitigullu aamma pisussaaffiliinani.
Silap pissusiata allanngoriartornera asuli oqalunnerusoq, Kinamiillu nassaarineqarsimasoq, Trumpip siusinnerusukkut oqaatigisimavaa. Taassuma Parisimi isumaqatigiissummit aninissaa qineqqusaarnermini aamma sioorasaarutigaa.
Nunat suliffissuaqarfiusut annerit arfineq-marluk, G-7-it, sapaatip-akunnerata siuliani ataatsimiipput, Parisimilu isumaqatigiissutigineqartoq Trumpip tassani isumaqataaffiginngilluinnarpaa. USA-llu isumaqatigiissummit aninissaa aalajangiiffigingajalernerarlugu Twitter-imini allassimalluni.
Taamaasillutik nunat suliffissuaqarfiusut naliginnaasuunngitsumik avissaartuutilerput.
Trumpip taama isummersornera nunat G-7-imi ilaasortat uggoraat.
- Canadami, Frankrigimi, Tysklandimi, Italiami, Japanimi Tuluillu Nunaannilu naalakkersuinikkut siuttut, EU-p præsidentiata EU-llu ataatsimiititaliarsuata siulittaasuata nalunaarutigaat Parisimi isumaqatigiissummi anguniarneqartut eqquutsinniarlugit sukataaruteqarniarlutik, nunat G-7-imi ilaasortat Siciliami ataatsimeereernerminni inaarutaasumik oqaaseqaateqarnerminni taama naqissusiipput.