Ullumikkut imminut qissatigineq ajorpunga, meeqqaalli pillugit qiasarpunga

Apersuinerup kingorna Gukki Nuka assimik toqqaaqqugakku qulanngilluinnarpoq. Ingerlaanneq ornillugu nassuiaalerpoq.

- Takusinnaavat silataanit qaamaneqanngilaq. Qaamaneq iluaninngaanneerpoq, assi pillugu oqarpoq.

Tassami qaamaneq pingaartippaa. Saqqummersitsinermi 'Revner i Sjælen'-imi taartoq qaamasorlu pillugit oqaluttuarniarpoq, aamma isumatsanneq neriunnerlu, toqungajanneq aamma toqunnginnissamik aalajangerneq.

Tamannalu pissutigalugu assinik saqqummersitsinermut ilaasoqanngilaq; tamanna uterfigissavarput.

Atornerlunneqarneq toqqorniarlugu imminut neriorsortoq
Gukki Nukap isertugaatini assitigut tamataqarani saqqummiunnissaanut ukiut 33-t ingerlasimapput. Tamannalu nukappiaqqap 14-inik ukiullip taamaaliunngisaannarnissaq neriorsuutigisimavaa.

Asasara ataata, asasara anaana,
asasakka qatanngutikka,
suna nammatarineriga paasisuugussiuk...

Anniaat nipangiussaq,
Nipeqanngitsoq,
aliasunneq qaangerneqanngitsoq.

Taallami 'Jeg fortæller det aldrig'-mik qulequtaqartumit tigulaagaq taama allaqqavoq, taanna Gukki Nukap saqqummiinermut atatillugu allassimavaa.

Atuaruk: Kinguaassiutitigut atornerlugaasimanermut assit sakkortuut

Ukiorpassuilli qaangiuttut sivisuumik ingerlareerluni oqaluttuaraa. Siullermik qatanngutaata arnap paaseqqaarpaa, arnaata Nuummi saqqummersitsineq sioqqutilaarlugu paasivaa.

- Oqaluuserissallugu suli paqumigineqarnerpaat ilaanniipoq. Ingammik angummut, Gukki Nuka oqarpoq.

- Angutit qanoq ittuunissaannik malitassatsinnik misigisimanitsinnik tamanna ilaqarpoq.

Assit imminut suilat
Aallaqqaammut assit saqqummersinneqartut takuneqannginnissaat siunertaanngikkaluarpoq. Gukki Nukap imminuinnaq suliarisimagaluarpai.

- Tamannalu pissutigalugu aamma unneqqarilluinnartuupput, taanna nassuiaavoq.

Tamanna ilisarisimasaata smartphonemut programimut ilisaritimmagut aallartippoq, taanna titartaalluni atorneqarsinnaavoq. Programmi ilinniarniarlugu pinnguarillugu aallartippaa.

Nammineq assiliisussanngorlugu imminut assilisinnarluni assit suliarisarpai. Piffissami tassani assit atornerluinermut tunnganissaat eqqarsaataasimanngilaq, kisianni ullut ilaanni Gukki Nukap paasilerpaa tassunga tunngasumik suliaqarluni aallartissimalluni.

- Eqqaamaqqissaarpara. Titartarniarlugit imminut assilivunga. Taava timera eqingasoq malugilerpara.

- Atornerlugaaneq iluarsartuutileriga assit oqaluttuuppaannga.

Saammaassineq
Assit amerliartuinnarput maannalu katillugit 2.000-iupput. Ullut ilaanni Nuummi Eqqumiitsuliortunut Saqqummersitsivimmi pisortamut Nivi Christensenimut assilisani takutinnissai saperunnaarpaa.

- Tamanna suli iliuuseqarfigeqqinnissaannut kajumissaarutaannguatsiarpoq.

Nivi Christensenip assit takoreernerisa kinguninngua Gukki Nuka SMS-ikkut allaffigitippoq.

'Saqqummersitsinerit suliarilara', Nivi Christensen allappoq.

- Sekundit pingasuinnaat ingerlanerini akivunga: 'Taamaaliorniarta'.

Taakku marluullutik ukiut marluk ingerlanerini suliniut suleqatigiissutigaat. Asserpassuit taakku ilaat ilanngunneqanngillat, pinngitsaaliineq toqqaannartumik oqaluttuarimmassuk.

Saqqummersitsineq unneqqarillunilu annernartuutinniarneqarpoq, kisianni aamma saammaateqatigiinnittuulluni.

- Uanga nammineq oqaluttuaraara, taamatullu oqaluttuarineqarnissaa isumaqarpunga, Gukki Nuka oqarpoq.

Ujarak qernertoq
Ukiut sisamat missaasa matuma siorna Gukki Nuka ingerlaqqinniaruni ikiorneqartariaqarluni nassuerpoq.

- Ilunni ujaqqamik qernertuinnarmik manngertumik peqarsimavoq. Kisianni kingorna qaamanermigut kissalaartunngoriartorluni oqiliartorpoq. Sungaartunngorluni naggataatigut pujoq qaqortutut ililluni tammarpoq.

Gukki Nukap nukappiaqqap 14-inik ukiullip iluminut atornerlugaaneq sioqqullugu taanna ikineqannginnerani piffissami nuannaarfigisaminut uternertut oqaluttuaraa.

- Kingunerlunnera inuuninniittuassaaq, kisianni maanna annilaanganeq katappara, taanna nassuiaavoq.

Siornatigut inuit oqaluukkaangamigit isaatigut isigineq sapertarsimavaa. Uani apersuinermi tamanna ajornartorsiutaanngilluinnarpoq.

Atuaruk: Gukki Nukap inuunera eqqumiitsuliornerup annaappaa

Gukki Nukap angut taanna pinngitsaaliilluni atornerluisimasoq takoqqissimanngilaa. Taannami ukiut 15-it sinnerlugit matuma siorna toqusimavoq, Gukki Nukap atornerluineq pillugu oqaluuserinninnissaa sioqquterujussuarlugu.

Maannakkullu saqqummersitap ilaa Kalaallit Nunaanni angalaarunneqarnissaanut periarfissanngorpoq, taanna aamma najugarisimasaani Uummannami takutinneqassaaq-

- Neriuppunga tassunga atatillugu tikissinnaassallunga.

Naak maqaasigaluarluni illoqarfik inuusuttuunerminiilli tikeqqinnikuunngilaa.

- Ilerra alakkarniarpara. Isumakkeerfiginikuuara, kisianni qanoq pisimaneraanga oqaluttuunniarpara, taanna oqarpoq.

Nikassaanerit
Gukki Nukap pinngitsaaliineq peqqarniitsutut oqaluttuaraa. Timikkulli atornerluineq kisimi kingunerlutsitsinngilaq. Ukiut siuliinik nikassaanerit misigisai aamma taama peqqarniitsigisimapput.

Timersortarfimmi ineeqqamut aallertussaalluni pisoq oqaluttuaraa. Maluginngisaanik pinngitsaaliisup malissimavaa.

Taassuma matu paarnaarpaa, nukappiararlu qanoq iliorusunnerlugu oqaluttuuppaa. Sivitsulaartoq piaarinerariarluni ingerlatippaa.

- Maannamut ingerlatiinnarlunga oqariartuutigaa.

Atuaruk: Atornerlutsinnerup kingorna angut inuusuttoq saqqummertoq

Nikassaanerit ingatsikkiartorput, angullu allat saniani nikorfatillugu oqalussinnaasarpoq. Gukki Nuka ikioqqulluni nilliasimagaluarluni isumaqarpoq, ullumikkulli ikiortissarsioraluarneq nipaqarsimanngitsoq inernilerpaa.

- Qanoq iliornera allat takusinnaanngikkaat paasisinnaanngilara. Ikiortissarsiorlunga nillianera tusaaneqanngitsoq, tamatuma oqaluttuarinerani Gukki Nuka sivikitsukullammik sanimut qiviarpoq.

Sooruna taassuma saassussisuusaarnera qisuariarfigineqanngitsoq?!
Sooruna inersimasut allat illaannartut?!
Ikiortissarsiortunga isikkut takusinnaannginnaminnga?!
Takusinnaanngilaat?!
Saperpat?!
Nammineq nipangiussisimasaqarpat...?

Taamatut qisuariartarneq Gukki Nukap atorunnaarsinniarpaa. Nipangiussineq aamma paqumiginninneq atornerluisut illersuutigilluarnerpaavaat. Taamaammat saqqummerpoq.

Henrik Thomsenip ukioq ataaseq matuma siorna taamaaliorsimasoq taamaammat arlaleriarluni eqqartorpaa. Meeqqat maanna atornerlunneqartut eqqarsaatigalugit eqqumiitsuliortumut 51-inik ukiulimmut nammatassaanngingajappoq.

Eqqaagaangakku qiasarunnaarnikuuvunga.
Aamma kisimiikkaluaraangamaluunniit.
Angutaavunga inersimasoq!
Kisianni meeqqat allat takugaangakkit tusaraangakkit qiasarpunga!
Isaanni ilisiarisarpara.
Aliasunneq taamaattoq.
Meeraq taanna inersimasup isaata tunuani.