innarliineq
Kinguaassiutitigut atornerlugaasimanermut assit sakkortuut
Gukki Nukap meeraanermini kinguaassiutitigut atornerlugaasimanini saqqummersitsilluni oqaluttuaraa. Nuummi Sisimiunilu saqqumersitsereerluni maanna Københavnimi saqqummersitsivoq.
Saqqummersitassanik ammaaneq aallaqqaammut allanut sanilliullugu naliginnaasuugaluarpoq.
Inuit assinik qimerluuipput imigalerlutik, ilisarisimasatillu ilassiorlugit.
Nordatlantens Bryggep pisortaanerata, Karin Elsbudóttirip pisortatigoortumik tikilluaqqusinissaa tikillugu.
Karinip saqqummersitat paqumigineqartut, meeqqanut kinguaassiutitigut atornerluinerit ilisaritippai. Sanialu eqqumiitsuliortoq Gukki Nuka pissagaqaluni nikorfavoq.
Gukki Nukalu nammineerluni ilisarititsilermat ini isersimaffigineqartoq nipaappoq. Saqqummersitami "Tarneq Sapersartoq" assitai aallaqqaammut nammineq pigisassamitut sanasimagaluarlugit oqaluttuaraa.
Eqqumiitsuliani qanoq isilluni atornerlugaasimanerminut kingunerlutsitsinerminut, inuunerminillu annassutigisimanerlugu oqaluttuaraa.
Kanngusunneq, anniarneq nipaannerlu oqaluttuarai. Qanorlu isilluni tarnimikkut anniaatini qalipaasersortarsimanerlugit.
Leonard Cohenip erinarsuusiaanik ullumikkut anniaatini qanoq isilluni qaamanermut saatissimanerlugit oqaluttuaraa.
Assit imminut tunngatitani Gukki Nukap oqarasuaatikkut assilisarisimavai iluarsaallugillu suliareqqillugit
"Tarneq Sapersartoq" saqqummersitat Nordatlantens Bryggemi aprilip 30-ata tungaanut takuniarneqarsinnaapput.