politi
Ukiukitsut ingasattumik pinngitsaaliinermut pasineqartut
Nunatsinni politiit piffissami kingullermi sulianik marlunnik ingasattunik kinguaassiutitigut pinerlunnernik pinngitsaaliinermut tunngasunik misissueqqammerput, taakku ukiukitsunit nunaqarfinni assigiinngitsuni marlunni pipput
Suliani assigiinngitsuni marlunni ukiukitsut ingasattumik kinguuaassiutitigut pinerluuteqartutut pinngitsaaliilluni kujannittutut pasineqarput, taakku Tasiilap eqqaani nunaqarfimmi aamma Upernaviup eqqaani nunaqarfimmi pisimapput.
Nunatsinni politiit ilisimatitsipput, suliap aappaani 13-nik ukiulik niviarsiaqqanut peqatiminut marlunnut pingasoriarluni pinngitsaaliilluni kujannissimasutut pasineqartoq.
Aamma atuaruk: Politiit pinngitsaaliisumik ujaarlerput
Suliap aappaani aamma 13-inik ukiulik niviarsiaqqamut peqatiminut pinngitsaaliilluni kujannissimasutut pasineqarpoq, aammalu aqqaneq-marlunnik ukiulik niviarsiaqqamut aalajangiilluni pinerliissuteqaqataasutut pasineqarpoq.
Eqqartuussissutigineqarsinnaanngitsut
Politiinit tusagassiuutinut nalunaarummi nunaqarfiit sorliit pineqarnersut ilisimatitsisutigineqanngilaq.
Pinerluuteqartut pillaatissinneqarsinnaanerminut ukiuisa ammut killingat qaangeqqanngimmatigit, pasineqartut taakku eqqartuussissutigineqarsinnaanngitsut politiit nalunaaruteqarput.
Taakkulu inunnik isumaginninnermut suliaqarfinnut Kommuneqarfik Sermersuumi aamma Qaasuitsup Kommuniani suliassanngorteqqinneqartut nalunaarutigaat.
Atuaruk: Angut niviarsiaqqamik pinngitsaaliisimasutut pasineqartoq
Atuaruk: Pinngitsaaliisarnerit Kalaallit Nunaanni amerlanersaapput