Tunisassiorfiup ataasiinnaap kapisilittat naammagisimaarpai

Ukioq manna kapisilinniarfiunerani tunisisinnaaneq Naalakkersuisunit killiligaangaatsiarpoq, tamannalu Royal Greenlandip tunisassiorfiisa malugisinnaavaat.

Tassami tunisassiorfik Qeqertarsuatsiaaniittoq kisimi naammaginartumik kapisilinnik tunisiffiusimavoq.

Royal Greenland taama allappoq.

Piffinni amerlanerni pisaqartoqarpallaanngitsoq
- Umiatsiaararsorlutik aalisartut pingasut kapisillit katillugit ullormut 300 kilut missingi tunisarpaat, taamaattumik kapisilinnik tunisineq maani ingerlalluarpoq.

Nunaqarfik taanna kisimi pinnagu, ukioq manna kapisilinnik tunisineq ingerlanerluppoq, Royal Greenland allappoq.

Tassami aalisartut tonsip ataatsip affaalu taamaallaat tunisassiorfinnut tunisimavaat, Naalakkersuisut kingusissukkut - oktoberip qulingiluaani - inuussutissarsiutigalugu aalisisartut pisatik tunitsivinnut tunisinnaalernissaat aalajangiummassuk.

Kapisilinnik tunisinerup annikinnera Atlantic Salmon Federationip nuannaarutigissajunnarsivaa.

Canadamiut avatangiisinut illersuiniaqatigiiffiat aasalernerani Naalakkersuisut piumasaqarfigaat Nunatsinni kapisilinniarneq killiligaanissaa neriuutigalugu imaluunniit kapisillit niuerutigineqarunnaavinnissaat.

Oktoberip 31-ani kapisilinnik tunisineq unissaaq, ukiormannalu Royal Greenland sapaatip-akunnerialunni taamaallaat kapisilinnik Qeqertarrsuatsiaani, Nuummi, Maniitsumi aamma Kangaamiun tunisiffiusinnaapput.

Nuummi suli tunisisoqanngitsoq
Sumiiffinni amerlanerni tunisineq piffissami sivikitsumi annikippoq.

Atammimmi sapaatip-akunnera 42-up ingerlanerani aalisartoq ataasiinnaq kapisilinnik 22 kiilunik tunisivoq. Maniitsumi 120 kiilu, Kangaamiuni tunisassiorfik ataasinngormalli 256 kiilunik tunisiffigineqarsimalluni.

Royal Greenlandip Nuummi tunisassiorfia kapisilinniartunik suli tunisiffigineqarsimanngilaq, naak ammanikuugaluarluni.

Atuaruk: Kapisilinniarnermut politikki arlariinnit isornartorsiorneqarpoq

Royal Greenland neriulluarniartoq
Naak tunisisoqarluanngikkaluartoq, Royal Greenlandip neriuutigaa kapisillit 15 tonsit ukioq manna tunisassiarisinnaassallugit.

Nuna tamakkerlugu ukiut siuliini 58 tonsit ilaatigut pisarineqartarput.

- Kapisillit tunitsivinnut tunisaasinnaalernerisa kingusinaarunneqarnerata kingunerisaanik tunisat ikitsuinnaanerannut pissutaavoq, Royal Greenlandimi tunisassiorfinnik ingerlatsinermi ingerlatsisoq Møller Lyberth oqarpoq.

Atuaruk: Kapisillit aalisakkerivinnut tunineqarsinnaanngorput