Kapisilinniarnermut politikki arlariinnit isornartorsiorneqarpoq

Aalisarnermik inuuniuteqartut kisimik kapisilinniarnissaannik naalakkersuisup Karl-Kristian Krusep Siumumeersup avammut oqariartuutaa arlariinnit isornartorsiorneqarpoq.

Kapisillit tunitsivinnut tunisaasinnaajunnaarneranut Naalakkersuisunit suna tunngavigineqarnersut nalornissutigineqarpoq.

Tunisassiorsissaanermut periarfissaq
Kapisilinnik tunisassiorfinnut tuniniaasoqaqqissinnaalertariaqartut, Aalisarneq Pillugu Siunnersuisoqatigiit KNAPK-tulli isumaqarput. Siunnersuisoqatigiit taama imaqartumik aalisarnermut naalakkersuisoqarfimmut allagaqartut, siunnersuisoqatigiit siulittaasuat, Bent Sørensen oqarpoq-

Radioavisi nutaarsiassiivoq.

- Taanna imaqarpoq, kissaatigalugu taanna tunisisinnaaneq ammaanneqartariaqartoq. Naak annertunginarsinnaanngikkaluartoq, tamaasa qiviaraanni, kisianni pingaaruteqartutut isigigatsigu, kalaallit nioqqutissiaannik Kalaallit Nunaata iluani siaruarterisinnaaneq pingaaruteqarluinnarmat, Bent Sørensen oqarpoq.

Bent Sørensen oqaluttuarpoq kapisilittassiissutit 45 tonsiinnaaneri tunisassiorfinnut tunisisinnaannginnermut Naalakkersuisut Aalisarneq Pillugu Siunnersuisoqatigiinnut tunngavilersuutigisimagaat.

Taamali tunngavilersuuteqarneq Siunersuisoqatigiit paasiuminaatsippaat.

- Tamannalu tunngavigalugu tupaallaatigigatsigu, tassami ukiout siulii qiviaraanni massakkut pisassat appasinnerummata. Taava kisianni tunineqartussanngooq annikimmata, annikinneri taakku tunngavilersuutigineqartut, taanna oqaasiinnakkut tusallatsiaannarparput. Taamaammat Aalisarnermut Siunnersuisoqatigiit Naalakkersuisoqarfimmut allagaqarnikuupput, Aalisarnermut Siunnersuisoqatigiit siulittaasuat, Bent Sørensen taama oqarpoq.