silaannakkut angallanneq
Timmisartortitseqatigiit naammagittaalliorput: Mittarfimmik aqqusaarnermut akileraarut qaffasippallaaqaat
Angalasut Københavns Lufthavnimut akiliivallaarsimanerat pillugu aningaasallu utertikkusunneqarput, SAS taama isumaqarpoq. Mittarfeqarfiit Danmarkimisulli akiliisitsisarpoq
2,5 milliardi koruunit. Timmisartortitseqatigiit Københavns Lufthavnip 2015-miik 2019-ip tungaanut akileraarutinik taama qaffasitsigisumik piumasaqarnerat annertuvallaarsoraat, dr.dk taama allappoq.
SAS-i Air Greenlandimut 37,5-iminik piginneqataasoq timmisartortitseqatigiiffiit nunanit allaneersut peqatiigalugit, IATA, Danmarkimi angallannermut ministerimut naammagittaalliuuteqassapput. Assersuutigalugu Københavnimiik Aalborgimut angalassagaanni 500 koruuneqarpoq mittarfimmulli akileraarut 200 kroruunit missaaniilluni, SAS paasissutissiivoq. Aningaasat kiffartuussinermik pitsanngorsaanermik billetsinilluunniit akikillisaanermik atorneqarsinnaangaluartut timmisartortitseqatigiiffiit isumaqartut, dr.dk taama allaaserinnippoq.
Atuaruk: Nunatta Islandillu akornanni timmisartuussinerit amerlanerusut
Air Greenlandi Danmarkimi Københavns Lufthavnimut aqqusaaraangami aamma akileraarutinut akiliisarpoq.
Air Greenland 400 koruuninik akiliisarpoq
Akiliutigineqartut mittarfiup ingerlanneqarneranut, isumannaallisaanikkut nakkutilliinermut, nassatanik suliarinninnermut terminalinik iluarsaassinernut, mittarfimmut ingerlatsinermullu assigiinngitsunut atorneqartarput.
Air Greenland Københavnimut angallassinerani billetsimut akigitinneqartup qaavatigut 400 koruunit ilanngunneqartarpoq.
Kalaallit Nunaata aamma Københavnip akornanni siumut utimullu timmisartuussinermi aningaasartuutit, Air Greenlandip sunniuteqarfigisinnaanngisai 800,- kr,-it missaanniipput, Air Greenland nittartakkamini paasissutissiivoq.
Atuaruk: Aningaasaliisut tapiinerisigut mittarfiit nutaat akilerneqassapput
Akileraarutit assigiinngitsut marluk Air Greenlandip Mittarfeqarfimmut tikinnermini aallarnerminilu Kangerlussuarmi aamma akiliutigisarpaat.
- Mittarfeqarfiit mittarfinni tamani isumannaallisaanermut akitsuutinik akiliisitsisarput. Akitsuut nunap iluani angallavini tamani 30 kr.-inut aalajangigaavoq, kiisalu Danmarkimut, Canadamut Islandimullu angallavinni 180 kr.-inut aalajangigaalluni, Air Greenland paasissutissiivoq.
Mittarfeqarfiit annerusumik akiliisitsisarpoq
Mittarfeqarfiit mittarfimmik aqqusaarnermut akigititai ukiup qanoq isinera sumullu angalaneq apeqqutaatinneqartarput. Aasaanerani Kangerlussuarmiik Københavnimut angalanermi 371. koruuneqarpoq ukiaaneranilu akiliutigineqartussaq 402. koruuniulluni.
Nuummiik Kangerlussuarmut angalanermi mittarfimmut akileraarut aasaanerani 169 koruuneqarpoq ukiukkullu 246 koruuneqarluni, akileraarutit Danmarkimi mittarfeqarfinnut akileraarutigineqartartut assigivaat.
Københavnimi mittarfimmut akileraarutit Europami nunani anginerusuni sanilliutissagaanni akisugineqarsinnaanngilaq, Københavns Lufthavnimi attaveqatigiinnermut pisortaq, Henrik Peter Jørgenseni DR-imut oqarpoq.