takornariat
Takornariat aatsaat taama amerlatigisut
Takornariartalersut nutaat pingaartumik USA-meersuupput, Tuluit Nunaanneersuullutik Tysklandimeersuullutillu
Takornariartitsisartunut ukioq 2015 ingerlalluarsimaqaaq. Angallatileruttornerup nalaani takornariat nunanit allaneersut 9,1 procentimik amerlanerusimapput, angalasulli Danmarkimersut nunatsinneersullu 13 procentimik ikileriarsimallutik.
Amerika Avannarleq
Takornariat pingaartumik Amerika Avannarlermeersut, Tuluit Nunaanneersut, Frankrigimeersut Tysklandimeersullu amerleriarsimapput. Takornariaqarnermullu siunnersuisoqatigiit Visit Greenlandip pisortaata Anders Stenbakkenip siuariarnermut pissutaasut arlallit tikkuarpai.
- Kalaallit Nunaat ukiuni kingullerni tikikkuminarnerulersimavoq, ilaatigut Islandip Kalaallit Nunaatalu akornanni timmisartuussisarneq pissutaalluni. Tamatuma saniatigut takornariat misigisassaannik tunisassiavut nittarsaanniarlugit annertuumik suliniuteqarsimavugut. Takornariaqarnermullu siunnersuisoqatigiinnit sapinngisatsinnik ikiuunniarsimavugut. Ilaatigut kikkut takornariartarnerannik, sunik piumasaqarnerannik qanorlu Kalaallit Nunaannik misigisaqarnerannik misissuinermut peqataasimavugut, suliaqarfillu taamaalilluni tunisassiamik ineriartortinnissaanut nutaanik atugassaqartilersimallugu, Anders Stenbakken erseqqissaavoq.
Aamma atuakkit: Air Greenland rekordiliinerup kingorna: Akia apeqqutaavallaanngilaq
Air Greenlandip qanoq iliorluni Kalaallit Nunaannut angalasunik amerlanernik iluatsitsisinnaasimanera pillugu Sermitsiaq normu 39 atuaruk. Aviisi najukkanni pisiniarfimmi imaluunniit ingerlariaqqiffissami allaaserisap matumani ataaniittumi pisiarisinnaavat.