Siunnersuisooqatigiit nutaamik siulittaasoqalerput

Imigassaq ikiaroornartorlu pillugit siunnersuisooqatigiit inissititserlutik ataatsimiinneranni Britta Nielsen Johansen siulittaasussatut toqqarneqarsimavoq.

Britta Nielsen Johansenip Nivé Heilmann, 2013-imiilli siulittaasuusimasoq kingoraaraa, Uju Petersen siulittaasup tulliatut ingerlaqqippoq.

Siulittaasunngortup nutaap imigassartorsimalluni nakuusertarneq unammillernartutut isigaa, tassami politiinit kisitsisit takutimmassuk nakuusertarneq suli annertusoq, naak imigassartortarneq appariartoraluartoq.

- Pinerlunnerit amerlanersaat - nakuusernerit ilanngullugit - imigassartorsimatilluni pinerluutaasarput, pingaartumillu meeqqat inuusuttullu sumiginnagaasarlutik. Nunatsinni meerartagut inuusuttagullu aanngajaarniutinit, soorlu imigassamit hashimillu pingaarnerutissavagut, Britta Nielsen Johansen oqarpoq.

Siunnersuisooqatigiit aanngajaarniutinut aningaasanoorajunnermullu tunngasunik pinaveersaartitsinermut, peqqissuunissamik suliniuteqarnermut, nakkutilliinermut, nakorsaanermullu atatillugu siunnersuisartuupput. Siunnersuisooqatigiit Naalakkersuisunut naalakkersuisoqarfinnullu attuumassuteqartunut siunnersuisartuupput.

Atuaruk: Politimesteri: Pitsaaliuinermut ataavartumik suli sulisoqartariaqarpoq

- Imigassaq Ikiaroornartorlu pillugit Siunnersuisooqatigiinnik qanimut pitsaasumillu suleqateqarnissara qilanaaraara. Aanngajaarniutinik atornerluineq aningaasanoorajunnerlu, innuttaasut peqqissuunissaat anguniarlugu suliniummi Inuuneritta II-mi suliniutaasussani pingaarnersiukkat ilagaat. Atornerluineq; meeqqat, inuusuttut ilaqutariillu ajornartorsiutaasa ilarpassuinut patsisaavoq. Atornerluinermut tunngatillugu unammilligassat anigorniarnissaat pisortaqarfiit akornanni ataqatigiissaarinissamik piumasaqaatitaqarpoq. Siunnersuisooqatigiit ilinniakkat- Naalakkersuisoqarfiillu akimorlugit katitigaanerat, ataatsimoorluni ajornartorsiutinik aniguiniarnissamut periarfissiivoq, taama oqarpoq peqqissutsimut naalakkersuisoq, Siumumeersoq Martha Lund Olsen oqarpoq.

Imigassaq ikiaroornartullu pillugit siunnersuisoqatigiit qulingiluanik ilaasortaqarput. Namminersorlutik Oqartussani naalakkersuisoqarfinni assigiinngitsuni, Politimestereqarfimmi aamma Kanukokami pineqartumi paasisimasalinnik siunnersuisoqatigiit katitigaapput. Taakkua saniatigut meeqqat inuusuttullu sinniisui marluk aamma timersornermillu sinniisoq ataaseq siunnersuisoqatigiinnut ilaapput.