kisitsisit
Politimesteri: Pitsaaliuinermut ataavartumik suli sulisoqartariaqarpoq
Innuttaasut inuttussusaat eqqarsaatigalugu Kalaallit Nunaat Danmarkimit sisamariaammik amerlanernik persuttaasoqarneranik nalunaaruteqartoqartarpoq kiisalu kinguaassiuutitigut pinerluutit Danmarkimut sanilliullugu 13-riaammik amerlanerullutik
- Ataatsimut isigissagaanni 2014 aamma 2013 allannguuteqarpallaanngillat. Kisianni kisitsisit ilaasa appariartornerat maluginiarneqarsinnaavoq.
Kalaallit Nunaanni politimesterip Bjørn Tegner Bayip Nunatsinni politiit kisitsisaat 2014-meersoq taamatut oqaaseqarfigaa.
Pinerluttaalititsinermut inatsit tunngavigalugu nalunaarutigineqartartut ukiuni kingullerni appariartortut kisitsisini takuneqarsinnaavoq. Nalunaarutigineqartut 4338-iupput 2014-mi. Nalunaarutigineqartut 4713-iupput 2013-mi.
Immikkut inatsimmi pinerluutit amerleriartut
Inatsimmili allami inatsisinik unioqqutitsinerit amerleriaateqarput.
- Inatsisinik unioqqutitsinerit amerleriaateqarsimasut oqaatigineqarsinnaanngilaq. 'Immikkut inatsimmi' pinerluttartut amerleriaateqarput. Inatsimmut tassunga innuttaasunit nalunaaruteqartoqarpallaarneq ajorpoq. Kisianni sulianik tamakkuninnga sulisuusut misissuinermikkut paasisarpaat inatsisinik unioqqutitsisoqartoq, politimesteri nassuiaavoq.
Politiit immaqaluunniit assingusumik suliaqartut misissuinerusalernerat pissutaalluni 'immikkut inatsimmi' unioqqutitsisut paasineqartarput. Ikiaroornartumik eqqussuinermi misissuinerit annertusarneqarput kiisalu aamma Issittumi Sakkutuut aalisartunik misissuisarput, suliffeqarfinni nakkutilliisut suliffeqarfinni misissuisarput kiisalu politiit aamma aqqusinermi angallannermi annertunerusumik misissuisalerlutik.
Danmarkimut sanilliullugu
Inatsimmut unioqqutitsisoqarneranut politiinut nalunaaruteqartartut 24 procentii pinerluttulerinermi inatsit tunngavigalugu nalunaaruteqartoqartarpoq. Tassani suliarineqartarput persuttaanerit, pinngitsaaliinerit kiisalu ukiukitsunik atoqateqarnerit. Innuttaasut inuttussusaat eqqarsaatigalugu nunanut allanut tamanna sanilliukkaanni kisitsit angisoorujussuuvoq.
Innuttaasut inuttussusaat eqqarsaatigalugu Kalaallit Nunaat Danmarkimit sisamariaammik amerlanernik persuttaasoqarneranik nalunaaruteqartoqartarpoq 2014-mi,kiisalu kinguaassiuutitigut pinerluutit Danmarkimut sanilliullugu 13-riaammik amerlanerullutik.
- Ataavartumik pitsaaliuinermut sulineq suli annertuumik sulissutigineqartariaqarpoq. Tamanna suleqatigiinnikkut ingerlanneqarsinnaavoq. Tassani innuttaasunik sullissisut, atuarfeqarfiit, peqqinnissaqarfiit, namminneq kajumissutsimik suliaqartut, Pinerlutsaaliuinermut Siunnersuisooqatigiit (PiSiu) kiisalu Kalaallit Nunaanni politiit suleqatigiinnerusariaqarput, Politimesteri Bjørn Tegner Bay oqarpoq.