Politikki
Siumumi politikkerip naalakkersuisumik tunuartitsineq nuannaarutigigaa
Martha Lund Olsenip naalakkersuisutut tunuartinneqarnera pissusissamisoorpoq, Kristian Jeremiassen (S) oqarpoq
Naalakkersuisut siulittaasuata Kim Kielsenip (S) Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu naalakkersuisoq Martha Lund Olsen tunuartikkaa Sermitsiaq.AG-p tallimanngormat allaaseraa.
- Naalakkersuisuni ilaasortaq 100 procentimit suliaminut tunniusimanngippat Naalakkersuisunit tunuartariaqarpoq, Kim Kielsen tusagassiortunik katersortitsinermini ilaatigut oqarpoq.
Atuaruk: Kim Kielsen tusagassiortunik aggersaavoq
Tunuartitsineq nuannaarutigaa
Qaasuitsup Kommuniani kommunalbestyrelsimi ilaasortaq Kristian Jeremiassen (S) qaammatip siuliani Martha Lund Olsen Naalakkersuisuuffimminit tunuaqqullugu kaammattuisimasut Kim Kielsenip aalajangernera nuannaarutigaa.
- Naalakkersuisut siulittaasuat pissutsinik takunnissinnaavoq ajornartorsiutillu aaqqinnissaannut piumassuseqarluni, Kristian Jeremiassen tusagassiuutinut nalunaarummi allappoq.
Atuaruk: Kajumissaat: Naalakkersuisoq tunuartariaqarpoq
Inuiaqatigiit tusaaniarpai
Kristian Jeremiassenip Marthe Lund Olsenip tunuartinneqarneranut kiffartuussinissamut isumaqatigiissut pissutaasoq qularinngilaa.
Kim Kielsenili tusagassiortunut katersortitsinermini kommunimut qinersinissamut Martha Lund Olsenip sassarnialikkersaarnera tunuartitsinermut pissutaanerarpaa.
- Matumani Naalakkersuisut siulittaasuata kujataani avannaanilu angallannikkut ajornartorsiorneq isigalugu periarnera pissutsinik piviusunik takunnissinnaanini ersersippaa. Tamanna toqqissisimanarpoq innuttaasullu ajornartorsiutaat tusaaneqarneri pitsaasuuvoq, Kristian Jeremiassen oqarpoq.
Ikummatissanut naalakkersuisup Múte b. Egedep (IA) Martha Lund Olsenip naalakkersuisuuffigiunnaaganut naalakkersuisuugallassaaq.
Atuaruk: Martha: "Taamaammat kommunalpolitikkimut nuulerpunga"