Kajumissaat: Naalakkersuisoq tunuartariaqarpoq

Qeqertarsuup Tunuani aamma Kujataani innuttaassut kommunimilu qinikkat angallannermut kiffartuussinermut isumaqatigiissutit sakkortuumik isornartorsiorpaat.

Umiarsuaateqarfik Disko Line taakkunani angallassisoq isornartorsiorneqarpoq. Aalajangiisunullu tamanna kinguneqartitsisariaqarpoq, Qaasuitsup Kommuniani kommunalbestyrelsimut ilaasortaq, Kristian Jeremiassen (S) isumaqarpoq, taassuma arlaleriarluni kiffartuussinermut isumaqatigiissutit sakkortuumik isornartorsiortareerpai.

Atuaruk: Kanukoka: Angallannermi malunnartumik ajornerulersitsisoqarpoq

Suliani sumiginnaraa
Taassumalu maanna Naalakkersuisut siulittaasuata Kim Kielsenip (S) attaveqarnermut naalakkersuisoq Martha Lund Olsen (S) soraarseqqullugu piumasaraa.

- Angallannermut naalakkersuisoq suliassaminik suminginnaasimavoq, Kristian Jeremiassen tusagassiuutinut nalunaarummi allappoq.

- Piffissami sivisunerusumi unnuisalerpugut. Napparsimasut aallarsinnaajunnaartut. Umiarsuaaraq sikumik sapersilluni utiinnartoq, ilaasullu saaffinginniffissaaruttut, Qaasuitsumi kommunimi politikeri oqarpoq.

Ukiukkut imaatigut siku pissutigalugu angallassisoqarsinnaanngitsoq, taassuma oqaatigaa.

Atuaruk: Kommunimi politikerit Disko Line isornartorsioraat

Tunuarit
- Naalakkersuisoq suliaminik sumiginnaasimavoq naak nalunngikkaluarlugu atukkat innuttaasunut ajorseriaataasussaagaluartut, Kristian Jeremiassen oqarpoq.

Taannalu Naalakkersuisunut erseqqissumik kajumissaarivoq:

- Angallannermut naalakkersuisoq tunuartariaqarpoq, Kristian Jeremiassen oqarpoq.

Atuaruk: Najukkami qinigaq: Kiffartuussinissamut isumaqatigiissutit annertuumik ajornerulerput

Tamatumunnga naalakkersuisuusimasoq Knud Kristiansen, Atassummi siulittaasuusimasoq, kiffartuussinermut isumaqatigiissutit pillugit sakkortuumik isornartorsiorneqarnikuuvoq.

Atassut naalakkersuisoqataajunnaarnikuuvoq, tamatumalu kingorna Knud Kristiansen partiimi siulittaasutut tunuarluni partiimiikkunnaarpoq.