Siulersuisut nutaat mittarfiliornerit piviusunngortissavaat

Sisamanngornermi suliffeqarfiit nunanit tamalaaneersut suleqatigiit, Kalaallit Nunaanni mittarfinnik sanaartornernut aningaasaliinissaminnut kissaateqarlutik saqqummiuppaat - pingaartumik Nuummi Ilulissanilu tallineqartussatut taaneqarput.

Aningaasaliinissamut ajunngisaarneq, Naalakkersuisut nuannaarutigalugu tallimanngornermi oqaatigaat.

Atuaruk: Milliardinik aningaasaliisartut mittarfinnut nutaanut suleqatigiittut

Mittarfiit tallineqarnissaannut aamma nutaanik sanasoqarnissaanut siulersuisunit nutaanit aqunneqarlutillu pilersaarusiorneqassapput, taakku tassaassapput inuussutissarsiortut namminersortut.

- Pikkorissunik siulersuisoqassaagut, taakkulu aningaasaliinissanut assigiinngitsunut aalajangiisuussapput, Randi Vestergaard Evaldsen (D) oqarpoq.

Katillugu ukiuni pingasuni suliassaq
- Sikuki Nuuk Harbouritut aaqqissuussaassaaq, taanna iluatsilluartorujussuuvoq, aningaasaqarnermut naalakkersuisoq Nuummi umiarsualiviup allineqarnerani suliaqartut pillugit oqarpoq.

Sikuki 2013-imi decembarimi pilersinneqarpoq, umiarsualivillu nutaaq ukiaru (2016) piareerneqarnissaa naatsorsuutigineqarpoq.

- Taakku (Sikuki Nuuk Harbour, aaqq.) pitsaasumik isumaqatigiissuteqarput, tassanilu nunanit tamalaaneersunit aningaasaliisitsisoqarpoq - nunanillu angisuunit, Vestergaard itisiliivoq.

Atuaruk: Nuuk Ilulissallu Kalaallit Nunaannut isaaffinngussapput

Nutaamik umiarsualiviliortut taamani siulersuisuisa naatsorsuutigisamit akikinnerusumik atornissartik iluatsippaat, taanna ingerlatseqatigiiffittut tapiiffigineqarnani immikkoortumik ingerlanneqartussatut.

Ukiuni aggersuni mittarfinnik sanaartortoqarnissamut Naalakkersuisut isumaqatigiissut taamaattoq takorloorpaat.

Randi Vestergaard Evaldsenip aamma Sermitsiaq.AG-mut oqaatigaa, Mittarfeqarfiit mittarfinnut nutaanut aningaasaliinissanut pissarsinissanut akisussaasuussanngitsut.

Illoqarfiit sorliit?
Sisamanngornermi aningaasaliisartut arlallit nalunaarutigaat, mittarfinnut takinerusunut aningaasaliinissaminnut piareeqqallutik - kisianni Nuummi Ilulissanilu kisimi.

Ingerlatseqatigiiffiup malittarisassaani immikkoortumi siunertamik imalimmi, ingerlatseqatigiiffiup siunertaani 'Ilulissani, Nuummi aamma Qaqortumi 2.200, 2.200 aamma 1.499 meterisut takissusilinnik sukkanerpaamik sanasoqassasoq' allaqqanissaa naatsorsuutigineqarpoq.

Naalakkersuisunik qanimut suleqateqarneq
- Aasaanerani aningaasaliisunik arlalinnik oqaloqateqassaanga, tassani ilaatigut modeli sorleq anguniassanerlugu paasiniassavarput, Naalakkersuisunut ilaasortaq nassuiaavoq.

Aningaasaqarnermut Naalakkersuisoqarfimmit oqaatigineqarpoq, siulersuisut ataavartumik Naalakkersuisut peqatigalugit ataqatigiissaartassagaa - umiarsualiviup allineqarnera assigalugu.

Mittarfiit pillugit oqaluttuat tamaasa takukkit