Politiit takunnittussarsiorput
Sisimiuni laserimik ulorianarluinnartumik timmisartumut seqertaasut
Sapaatip-akunnerani kingullermi mittarfiup tungaanut laserimik seqertaasunik, Sisimiuni politiit takunnittunik ujaasipput
Ataasinngormat sapaatip-akunnerani kingullermi nalunaaqutaq 16.30 missaani aamma 17.00 missaani laserimik qorsummik qalipaatilimmik Sisimiuni mittarfiup timmisartunik aqutsisoqarfianut seqertaasoqarpoq.
Aamma arfininngormat nalunaaqutaq 15.40 missaani timmisartumut mikkiartortumut laserimik qorsummik seqertaasoqarpoq.
Sisimiuni politiit maanna timmisartumut aamma mittarfiup timmisartunut aqutsisoqarfianut laserimik seqertaasunik takunnissimasunik ujaarlerput.
Annertuumik kinguneqartitsisinnaasoq
- Mittarfimmi timmisartunut aqutsisoqarfiani sulisunut aamma timmisartumut laserimik seqertaaneq timmisartup isumannaallisarneranut tunngasumik annertuumik kinguneqartitsisinnaavoq, taamaattumillu suliaq tamanna politiit asuliunngitsutut isigaat, politiit tusagassiorfinnut nalunaarummi allapput.
Laserimik mittarfiup aqutsisoqarfianut timmisartumullu seqertaasunik takunnissimasinnaasut, Sisimiuni politiinut attaveqaqquneqarput telefon 70 13 22-mut.
Aamma atuakkit:
Timmisartortartut laserinik seqerfigineqartartut
Laserlys timmisartut tungaannut