Timmisartortartut laserinik seqerfigineqartartut

Timmisartoq milertilluni aquttartoq laserimit seqerfigineqarpat annertuumik kinguneqarsinnaavoq.

Air Greenlandimi aquttartoq Nuummut sapaatip akunnera kingulleq milertilluni seqerneqarpoq.

- Timmisartumi isumannaallisaanermut eqquisoqartarpoq taamaasisoqartillugu, Air Greenlandimi timmisartut ingerlaarnerannik nakkutilliisoq Jacob Nitter Sørensen, Sermitsiaq.AG-mut oqarpoq.

Air Greenlandip nalunaarutigaa taama pisoqartillugu tamatigut politiinut nalunaarutigisarlugu. Uanili pisumi paasineqanngilaq kina taamaasiornersoq.

Jacob Nitter Sørensenip nassuiarpaa ukiup imaasinerani timmisartunut aquttunut seqersaaneq navianarsinnaasoq.

- Aquttarfiup qullii sakkukillineqartarput aquttut taartumi isigisussaanerat pissutaalluni. Timmisartup milernerani laserimit seqerfigineqariataarneq annertuumik kinguneqarsinnaavoq. Aquttummi miffissartik isigiunnaarsinnaavaat. Tassanngaannit timmisartortartoq aalajangersinnaavoq illoqarfimmut allamut miinnarniarluni. Timmisartortartup suliffini aamma annaasinnaavaa, timmisartortartuuniaraannimi isigilluarsinnaasariaqarpoq, Jacob Nitter Sørensen nassuiaavoq.

Piffissani aalajangersimasuni taamatut pisoqartartoq oqaatigaa. Tusagassiutinut ukioq kingulleq tamanna nalunaarutigineqarmat aquttunut laserimik seqertarneq unitsiimineqarpoq.

- Qujanartumik silaqqinnerani taamaasisoqartarpoq. Pujortillugu taamaasisoqariasaassappat navianartumik pisoqariasaarsinnaavoq, Jacob Nitter Sørensen oqarpoq.