inuussutissarsiorneq
Sisimiuni iluatsittoq namminersornissamut aamma nutaamik pilersaarutinut periarfissanippoq
Sisimiuni Igloo Mountainimik piginnittut aallartisaanermi ikiortaasup Greenland Venturep piginneqataassutaat pisiariniarlugit aalajangerput,
2008-mi Greenland Venturep aallarnisaasullu sisamat Sisimiuneersut piginneqatigiiffik Igloo Mountain Aps pilersippaat.
Taamanili anguniagaavoq piginneqatigiiffik ukiut qulit ingerlaneranni namminiilereersimassasoq, avataaniik aningaasalersorneqarani.
Maannalu aallartisaanermi ikiortaasut Greenland Venturep piginneqataasutaat Sisimiuni piginnittut pisiarinerat piviusunngorpoq.
Siunissamut qilanaartut
Klavs Sefeld Møller taama allappoq, taanna Lars Kristian Madsen, Hans Frederik Olsen aamma Laarseeraq Skifte peqatigalugit maannakkut piginnittuulersunut ilaavoq.
– Aningaasarpassuit eqqartorneqarput Greenland Venturemiit aningaasaliisoqarlunilu taarsigassarsiisoqarsimanngikkaluarpat nammineerluta tamanna kivissimasinnaanngikkaluarparput. Massakkut piginneqatigiiffik ima nukittutigilersimavoq nammineersinnaalersimalluta suliffeqarfippullu ineriartorteqqissinnaalerlugu. Tamannalu qilanaaraarput, Klavs Sefeld Møller oqarpoq.
Atuaruk: Sisimiuni takornarialerisut: Paatsuuinermik tunngaveqarluni tulleriiaarineq
Naammassinninneq pitsaasoq
Greenland Venturemit suleqatigiinneq maanna naammassisoq aamma naammagisimaarneqarpoq.
- Greenland Venturep aningaasaliissutai tassaasimapput piginneqatigiiffimmut aningaasaliineq kingusinnerusukkullu taarsigassarsisitsineq. Per Buhl Olsen Greenland Venturemeersoq oqarpoq taassuma Igloo Mountainip pisinera 'iluatsilluartutut oqaatigaa.
Periarfissarpassuaqartoq
Igloo Mountainip anguniagaa siulleq annertooq tassaavoq inuusuttut illuata eqqaani takorniarianut sammisaqarfiusinnaasumik pilersitsinissaq, tassunga ilaalluni umaasuusivik umimmaqarlunilu tuttulik. Sisimiup naatsorsuutigaa piffissap sivikitsup ingerlanerani umiarsuarni takornarissat 10.000-it tikittalernissaat Igloo Mountainillu taakkua 80 procentii periarfissanut nutaanut pissanganartunut soqutiginnissasut.
Piffissaq ungasinnerusoq isigalugu Aqqutikitsup sermitaani sisorarttarfiliornissaq takorluugavoq. Amerikkarmiut sisorarnermut ilisimasallit nalilersimavaat ukioq naallugu aamasarsinnaasoq periarfissarpassuarnik ulikkaartoq.
Atuaruk: Sisimiuni inuusuttut ornittagartaassapput