Sisimiut
Sisimiuni inuusuttut ornittagartaassapput
Inuusuttut ornitagassaata inissiffissaa pillugu Sisimiuni inuusuttut isummersoqataatinneqarput
Sisimiuni inuusuttut ornittagaat heliportitoqqamiittoq aggustip aallaqqaataani illumik nutaamik Nalunnguarfiup Tasiata eqqaaniittussamik taarserneqassaaq. Qeqqata Kommunia aamma Ejendomsselskabet Sisimiut Ungdomshus illup attartornissaanik isumaqatigiissuteqarput kiisalu ingerlatsinissamut Igloo Mountain ApS isumaqatigiissusiorfigineqartoq, Qeqqata Kommunia nalunaarpoq.
Sisimiuni inuusuttut ornittagassaannik nutaamik Sisimiuni sananissamik suliaq utaqqiloorneqartoq naammassiartulerpoq. Illup Nalunnguarfiup Tasiata eqqaanut inissinniarnera ukiup aappaa affaq oqallisaavoq.
Inissilluarnerussaaq
- Pilersaarutit siullermik Qeqqata Kommunalbestyrelsianut saqqummiunneqarput. Pingaarnertut pilersaarummut akuersereernerisigut, inuusuttut ornittagassaata inissinneqarnissaa, ornittakkamilu suut atugassarititaassanersut pillugit ukiup aappaata affaata matuma siorna inuusuttut pilersaarummut akulerutsinneqarlutik. Aningaasaliissutissat kiisami inissipput. Suliaq sivisuumik pissanganartumillu ingerlavoq, Ejendomsselskabet Sisimiut Ungdomshusimi pisortaq aamma Igloo Mountainimi siulersuisut siulittaasuat Laarseeraq Skifte oqarpoq.
Sisimiuni inuusuttut ornittagaat illoqarfiup isuani heliportitoqqamut inissinneqarnikuuvoq Sisimiut suluusalinnut mittarfittaarmata. Maannalu illoqarfiup iluaniilertussanngorpoq.
- Taamaalilluni illoqarfimmi meeqqat atuarfiisa, illoqarfimmi ilinniarfissuup Teknikimit Ilinniarfiup, Nalunnguarfimmilu illoqarfimmilu sunngiffimmi neqerooruterpassuarnut inuusuttut ornittagassaat, suli pinngortitamut tikikkuminartitsilluni ungasinngisaaniissaaq. Tamanna Sisimiuni inuusuttunut annertuumik nutaamik periarfissaqalersitsissaaq, Qeqqata Kommuniani borgmesteri Hermann Berthelsen Siumumeersoq oqarpoq.