SIK-mi siulittaasoq: Kinamiut aalisartut tikisissavagut?

Royal Greenlandip nunatsinni tunisassiorfinni kinamiut aamma filippinerit suliartortitat pillugit oqallinnermut ilanngullugu, Sulinermik Inuussutissarsiuteqartut Kattuffiata siulittaasua, Jess G. Berthelsen, kattuffiup nittartagaani oqallissaarummik ilanngussaqarpoq.

- Qanormitaava aalisarnermik inuussutissarsiuteqartut igissagaluarpaat SIK kaju­missaari­suup­­pat Kinamiit aalisartunik tikisitsisoqassasoq Qaqortumi ilaasortavut suliffissaqarniassammata, taamaasillunilu aalisakkanik tulaassuisoqarniassammat?

Sulinermik Inuussutissarsiuteqartut Kattuffiata siulittaasua taama apeqquteqarpoq, taanna februaarip qulingiluaanni ilisimatinneqarsimavoq, tunisassiorfimmut tunisisoqannginnera pissutigalugu Qaqortumi tunisassiorfik matoqqatinneqarsimasoq.

- Aalisartut tunisisinnaaniassammata aamma aalisar­tut kajumissaarisimasut ilisimavara, Jess G. Berthelsen allappoq.

Aamma atuaruk: RG: Nunaqavissunik sulisussarsisinnaannginnatta suliartortitsisarpugut

Oqallissaarut kinamiunut tunnganngitsoq
SIK-mi siulittaasup ilanngussani kinamiunut tunngassuteqanngitsoq erseqqissarpaa:

- Tikisitsisoq – tassalu Royal Greenland, aammalu tikisitsinissamut akuersisimasut, tassaasut kommunit aammalu naalakkersuisut pineqarmata, Jess G. Berthelsen allappoq.

Royal Greenland naapertorlugu, suliffeqarfissuaq Maniitsumi, Ilulissani Uummannamilu Royal Greenland Kinaminngaaneersunik katillugit 36-inik sulisoqareerpoq, maanna Udlæningestyrelsemiit sulisussat nutaat sulinissamut najugaqarsinnaanermullu akuersissutissaat utaqqineqineqarlutik.

- Aap, imaassinnaavoq sumiiffiit ilaanni sulisussanik amigaateqartoqartoq, kisiannili sumiiffiit ilaanni aamma suliffissaaleqisoqaqaaq. Tassami nunarput maannakkut 10 procent tiki­ngajallugu suliffissaaleqiffiuvoq. Taamaakkaluartoq avataaninngaanniit ilinniarsimanngit­su­nik tikisitseqattaarpugut fabrikkini sulisussanik. Tamannalu ataasiaannarnanga inuiaqa­ti­giittut ajorsarnertut oqariartuutigisarpara, Jess G. Berthelsen allappoq, taassuma naggataatigut kineseriinnarnik sulisoqalernissaa nunatsinnilu isiginnaartuinnanngornissarput ernumassutigaa.

Nunanit allanit suliartortitat atugarissaartitaaneruppat?
Kinamiut aamma SIK-p isumaqatigiissutai malillugit akissarsiaqartinneqartut Jess G. Berthelsenip ilisimallugu allappoq:

- Kisianni tamatuma saniatigut qanorpiaq isumaqatigiis­su­teqarfigineqarsimanersut ilisimanngilarput. Soorlu assersuutigalugu fabrikkini tunisassiassaarukkaangat SIK-mi ilaasortavut erngerlutik angerlartinneqartarput. Taava maluginiar­neqarsimavoq kineserit angerlartinneqarneq ajortut. Imaassimanerpa kineserit taamatut isumaqatigiissuteqarfigineqarsimasut?

- Qanormitaava issagaluarpa nunaqavissut sinerissameersut sumiiffinni Royal Greenlandip fabrikkiinut suliartorniartut aamma taamatut isumqatigiissuteqarfigineqartaraluarunik – assiliaq taava allarluinnaassava?

Aamma atuaruk: Mimi: Inuusuttagut Kinamiunut isiginnaaginnartuutinnagit sulilersitsigit