pinngitsaaliineq
Sermersooq suliamik asuliunngitsumik suliaqarpoq
Marlunngormat Nunatsinnit Politiit oqaluttuarivaat, ukiukitsup allanut ukiukitsunut marloriarluni pinngitsaaliilluni arneriffiginnissimanera. Sermersuumilu ilaqutariinnut isumaginnittoqarfimmi aappaa suliassanngortinneqarpoq
Sermitsiaq.AG marlunngormat allaaserinnineratut, Kalaallit Nunaanni politiit Qaasuitsup Kommuniani aamma Kommuneqarfik Sermersuumi nunaqarfiini ukiukitsut pinngitsaaliisimasut pasivaat.
Pinngitsaaliinerit aappaat Tunumi Kommuneqarfik Sermersuumi pisimavoq, maannalu Meeqqanut Ilaqutariinnullu Immikkoortumut suliassanngortinneqarluni.
Atuaruk: Ukiukitsut ingasattumik pinngitsaaliinermut pasineqartut
Ingerlaannaq qisuariartut
- Suliassaq tiguarput, ingerlaannarlu qisuariaateqarpugut. Ukiukitsut pineqarput, pisimasorlu nuanninngilluinnarpoq. Suliassaq ilungersunartoq pimoorulluinnarlugu suliarivarput, Meeqqanut, Ilaqutariinnut Atuarfeqarnermullu immikkoortumi pisortaq Tina Dam Rasmussen oqarpoq.
Meeraq kinguaassiuutitigut kannguttaatsuliorfigineqarpat Kommuneqarfik Sermersuumi aalajangersimalluinnartumik periuseq atorneqartarpoq, meeqqap pitsaanerpaamik ikiorneqarnissaa qulakkeerniarlugu.
Kannguttaatsuliortoq eqqugaasullu tamarmik ukiukitsuuppata, inersimasuunnginnerat aallaavigalugu Meeqqanut, Ilaqutariinnut Atuarfeqarnermullu Immikkoortortamit ajunnginnerpaamik ikiorserneqarnissaat isumagineqartarpoq.
Kanngutsaatsuliortoq aamma ikiorneqarpoq
Meeqqat kinguaassisuutitigut kannguttaatsuliorfigineqartillugit Kommuneqarfik Sermersuumi aaqqissugaalluinnartumik periuseqartoqartarpoq.
- Ukiukitsut allanut ukiukitsunut kannguttaatsuliorsimatillugit, kommunip suliassaraa pisoq ataatsimut isigalugu, taannalu aallaavigalugu kannguttaatsuliortoq eqqugaasorlu ikiorniarlugit kinguneqartussamik aaqqiissuteqarnissaq. Ajunnginnerpaamik aaqqiiniarluta meeqqat ataasiakkaat pisariaqartitaat aallaavigisarpavut, meeraq ikiorniarlugu meeqqamullu ilaqutaasut ataatsimut isigalugit periarfissat aallaavigalugit ikiorsiiniartarpugut, Tina Dam Rasmussen oqarpoq.