Sermersooq
Sermersooq meeqqanut inuusuttunullu nakuusernernut naaggaarpoq
Kommuneqarfik Sermersuup nunani tamalaani meeqqanut inuusuttunullu kinguaassiutitigut atornerluinermut nakuusernermullu pinaveersaartitsinerup ullua marlunngornermi malunnartippaat
Ukioq 2000-imiilli peqatigiiffik Women’s World Summit Foundation (WWSF) ukiut tamaasa novembarip 19-ianni meeqqanut innarliisarneq - pingaartumik kinguaassiutitigut atornerluineq qitiutillugu malunnartitsisarpoq.
Aaqqissuussinerit amerlanerusut
Kinguaassiutitigut killissamik qaangiiffigineqarsimasunut nuna tamakkerlugu saaffiginnittarfik Saaffik suleqatigalugu, Kommuneqarfik Sermersooq ullormi tassani Nuummi, Tasiilami Paamiunilu aaqqissuussiniartoq, kommuni ilisimatitsivoq.
Paasititsiniaaneq
Aaqqissuussat paasititsiniaanermut tunnganerussapput: Ilaatigut qitornaq kinguaassiuutinut tunngasunik qanoq pitsaanerpaamik oqaloqatigineqarsinnaaneranut aamma qanoq meeqqat kinguaassiuutitigut atornerlunneqarsimasut ilisarnaataat qanoq takuneqarsinnaanerinut ilitsersuisoqassaaq.
Ilungersunartoq
- Meeqqanut kinguaassiutitigut atornerluisarneq maani Nunatsinni suli annertuumik ajornartorsiutaallunilu ilungersunartuuvoq. Meeqqamut inuusuttumullu, ilaqutariinnut inuiaqatigiinnullu annertuumik kingunerlutsitsisarpoq, borgmester Asii Chemnitz Narup (IA) naqissusiivoq.
Atuaruk: Nalunaarusiaq: Kinguaassiuutitigut innarliinerit ajoquseerujussuartarput
Nipangiusimajunnaarlugu
- Kinguaassiutitigut atornerluisarneq ilaqutariinni najukkamilu inuiaqatigiinni nipangiusimaannarneqartarpoq. Taamaattorli ajornartorsiutip nipangiusimaannarneqarnera iliuuseqarfigalugu aallartipparput, inuiaqatigiinnilu oqaasinnguisarneq, paasisitsiniaasarneq eqqugaasunillu ikiuineq aamma katsorsaaneq pikkoriffiginerulernikuuarput. Pinaveersaartitsinerup ullua atorluarlugu sammisaq oqaluuseriuminaatsoq oqaluuserineqarnerulernissaanut sapiissuseqarfiginerulertigut, kinguaassiutitigullu atornerluinermik paasisaqassagaluarutta unnerluutiginissaannut sapiissuseqarnerulerluta. Meeqqavummi pillugit taamaaliortussaavugut, borgmester oqarpoq.
Sisamanngornermi pilersaarut Nuummi Katuami nalunaaqutaq 15.30, Tasiilami timersortarfimmi nal. 19.00 aamma Paamiuni Taqqissuummi nalunaaqutaq 18.30 aallartinneqassaaq.