Nalunaarusiaq: Kinguaassiuutitigut innarliinerit ajoquseerujussuartarput

Kinguaassiuutitigut innarlerneqartarneq aamma inuusuttut inuunerminnik naammagisimaarinnippallaannginnerat aammalu imigassamik ikiaroornartumillu atuivallaartarnerat erseqqissumik imminut ataqatigiipput.

Tamanna takutinneqarpoq kalaallit inuusuttut pillugit SFI-p, Det Nationale Forskningscenter for Velfærdip, nalunaarusiaani, nalunaarusiarlu taanna kinguaassiuutitigut atornerlugaasarneq pitsaaliorniarlugu suliniuteqarnisamut atorluarsinnaavoq, tamanna tusagassiutinut nalunaarummi atuarneqarsinnaavoq.

- Misissuinerup takutippaa meeqqat kinguaassiuutitigut innarligaasimasut atoruminaatsumik inuuneqartut. Meeraanermi kinguaassiuutitigut innarligaasimaneq siusissukkullu annertuumik imigassartortalersimanerup ikiaroortalersimanerullu aammalu pitsaanngitsumik imminut paasinnittaaseqarnerup aqaqatigiinnerat ersarippoq. Tamanna arnani taamatuttaaq aamma angutini atuuppoq. Taavalu aamma arnat inuusuttut kinguaassiuutitigut inarligaasimasut meeqqat atuarfiat naammassigaangamikku ilinniakkamik aallartitsisarnerat qaqutigoortarluni inuusuttuullutillu naartulertarnerat atuunnerusarluni, seniorforskeri Else Christensen, seniorforskeri Siddhartha Baviskar suleqatigalugu misissuisimasoq, oqarpoq.

- Kalaallit Nunaata inuusuttut ilarpassuinut tunngatillugu ajornartorsiuteqarnera aammalu inuusuttorpassuit kinguaassiuutitigut innarligaasimaneri imminnut ataqatigiipput. Taamaalilluni kinguaassiuutitigut atornerlugaasarnerup pitsaaliornissaa qitiutillugu suliniuteqarnissamut peqqutissaqarluarpoq

Ukiuni kingulliunerusuni arlalitsigut katsorsaasoqartarpoq pinaveersaartitsiniarlunilu suliniuteqartoqartarluni - kingullertigut kinguaassiuutitigut innarligaasimanertik pissutigalugu kingunerlutitsisunik katsorsaasartut illoqarfinni assigiinngitsuni katsorsaajartorlutik angalatinneqartalerput.

Taamaattumik Namminersorlutik Oqartussani Ilaqutariinnermut Inatsinillu Atuutsitsinermut Naalakkersuisoqarfiup misissuineq manna noqqaassutigisimavaa, siunissaq ungasinnerusoq isigalugu kinguaassiuutitigut atornerlugaanerup taakkununnga qanoq sunniuteqartarnera pillugu ilisimasaqarnerulernissaq kissaatigalugu, taamaaliornikkut pitsaaliuiniarluni suliaqarnermik nukittorsaanissaq siunertaralugu.

Nalunaarusiaq 'Kalaallit nunaanni inuusuttut. Kinguaassiuutinut tunngasut kinguaasiuutitigullu innarliisarnerit qititutinneqarlutik' ullumi marlunngornermi saqqummerpoq.