stemmeret
Savalimmiunut nunasisut ulloq siulleq qinersisinnaalertarput
Nunatsinnut nunasisut qinersisinnaanngornissaminnut ukiup affaa utaqqeqqaartartut, Savalimmiuni ulloq taanna nuunnermi qinersisoqarsinnaalertarpoq.
Nunasisut qinersisinnaatitaanerat Siumup killilerusuppaa.
Ullumikkut qinersisinnaaniaraanni ukiup affaa Nunatsinni najugaqaqqaartoqartariaqarpoq. Tamanna sivisunerusariaqartoq, Siumup Inatsisartuni gruppia taama isumaqarpoq.
- Taamaattumik isumaqarpugut inuit ukiup affaa maaniiginnarlutik qinersisinnaalersartut naleqqutinngitsumik sunniuteqarfisaraat nuna naalagaaffinngornissaminut suliaqaruttulersoq. Isumaqarpugullu nalilersortariaqartoq avataaneersut tamarmik ikinnerpaamik ukiuni 2-ni imaluunniit 7-ni Kalaallit Nunaanni aalajangersimasumik najugaqareeraagamik aatsaat qinersisinnaatitaasalersinnaanerat, siunnersuut taama tunngavilersorneqarpoq.
Savalimmiuni killilersuisoqanngitsoq
Savalimmiuni tamanna nangaassutigineqannginnguatsiarpoq. Tassani danskisut innuttaassuseqartut inunnut nalunaarsuiffimmi allaqqagunik Lagtingimut qinersisinnaatitaapput. Savalimmiut Københavnimi aallartitaqarfiata tamanna Sermitsiaq.AG-mut uppernarsarpaa.
Eqqunngitsumik oqaaseqartoq
Folketingimut tunngatillugu danskisut innuttaasuseqartut tamarmik, Naalagaaffeqatigiinnerup iluani najugaqarunik qinersisinnaatitaapput. Allaanerussutituaraa, partiit sorliit qinerneqarsinnaanerat, naalagaaffeqatigiiffiup suatungaani najugaqarneq apeqqutaalluni. Taamaalillunilu aamma Siumup gruppimi siulittaasuata kalaallit Danmarkimiittut ukiuni siullerni qinersisinnaannginnerarlugit KNR-imut oqarnera eqqunngilaq.
Ilinniartut eqqorneqarsinnaasut
Ullumikkut inatsisit malillugit kalaallit ilinniartut aamma kalaallit allat Danmarkimi najugaqartut angerlaqqikkunik eqqorneqassapput. Taakku aamma ukiup affaani siullermi qinersisinnaassanngillat. Siumup siunnersuutaa akuerineqassappat, aamma taakku eqqorneqassanersut maanna nalunarpoq.
Siumup siunnersuutaa annertuumik oqallisaavoq. Allaaserisat oqaaseqaatillu uani atuarsinnaavatit:
Siumut: Nuuttunut qinersisinnaatitaaneq killeqartinneqarli
Qinersisinnaanerup killilerniarneqarnera Demokraatit naleqqutinnginnerarpaat
Atassutip nunasisut ingerlaannaq qinersisinnaalersikkusuppai