Sara Olsvig: Meeqqat tamarmik assigiimmik pineqartassapput

Meeqqat pillugit suliat oqimaatsorpassuit, kommuninilu aqutsisoqarfiit suliassamik kivitsinissamik ajornakusoortitsisut. Sammisaq tamanna oqallisigineqaraangat, tamanna ersertarpoq.

- Kommunit suliassaq tamanna kivinniarlugu ilungersortut nalunngilarput, isumaginninnermut ilaqutariinnermullu naalakkersuisoq, Sara Olsvig (IA), Sermitsiaq.AG-mut taama oqarpoq.

Aalajangersakkap nutaap meeqqanut tapersiisup kommuninut oqinnerulersitsissaaq.

- Kikkut qanoq iliornersut, qaqugukkut aamma qanoq pisoqarnera erseqqarinnerulersissavaa, Sara Olsvig (IA) oqarpoq.

Inatsisartut apriilip 20-anni suliartoqqippata inatsit siullermeerneqassaaq. Ukiaanerani ataatsimiinnermi suliarineqareertussaanikuugaluarpoq, kisianni naalakkersuisoqatigiit allanngorneqarnerisa kingorna Sara Olsvigip naalakkersuisusunngoqqammerluni siunnersuut kinguartippaa.

Atuaruk: Siunnersuut: Atornerluisoqarneranik pasillertoqarneranut kommunit erngerlutik qisuariartassapput

Nunatsinni meeqqat pillugit suliat suliarineqartarneri maanna assigiinngissinnaasorujussuupput. Inatsisit nutaaq sinaakkusiissaaq, meeqqat taamaalillutik Nuummi imaluunniit Sisimiuni najugaqarunik assigiimmik pineqartarniassammata.

- Sullissisut qanoq iliussanerlutik paaseqqissaarunikku ajornannginnerulissaaq, Sara Olsvig isumaqarpoq.

Tamanna pissutigalugu inatsit aalajangersakkanik ilitsersuutinillu ersarissunillu imaqassaaq, taassumalu inatsisip qanoq paasisariaqarneranik kommunimi sulisunut paasinarnerulersissavaa.

Tamatuma saniatigut sukkanerusumik qisuariarluni iliuuseqartoqartarnissaa pingaartinneqassaaq, suliat oqimaareersut annertunerulinnginniassammata.

Siusissukkut iliuuseqarnermi ilaqutariit tamarmik ilanngunneqartassapput, taamaalilluni meeqqanik arsaarinnissuteqartarnerit naleqartitsinikkaat pinngitsoortinneqartalerneruniassammata.

- Pitsaaliunerup aallunneqarneratigut kommunit suliassaq kivissinnaanerulissagaat neriuutigaara.

Inatsit akuerineqassappat, kommunimi sulisut pikkorissartinneqarnissaannut Naalakkersuisut aningaasanik immikkoortitsereerput.

Naak inatsisip isumatinninnermut aqutsisoqarfiullu kommunimut tapersiillutik siunissami sulineq erseqqinnerulersittussaagaluaraa, siullermik saniatigut iliuuseqarnissamik pisariaqartitsissasoq Sara Olsvigip nassuerutigaa.

- Kommunit pulaarnikuuakka, ukiunilu tulliuttuni annertuumik ilungersornerusussaallutik ilisimavaat, taanna oqarpoq.

- Inatsimmilu siunertagut angunissaannut tamatuma isumalluartippaanga.