Siunnersuut: Atornerluisoqarneranik pasillertoqarneranut kommunit erngerlutik qisuariartassapput

Meeqqat pillugit inatsit nutaap siunertaa qularnanngilaq.

- Meeqqanut inuusuttunullu tunngassuteqartunut annertuumik pisariaqartumillu iliuuseqartoqarnissaa pisariaqartinneqartoq tamanit ilisimaneqarpoq, isumaginninnermut ilaqutariinnermullu naalakkersuisup, Sara Olsvigip (IA) inatsit pillugu saqqummiussaani taama allaqqavoq.

- Piffissami kingullermi nakkutilliiartorluni tikeraartarnerit amerlasuut aammalu MIO-p nalunaarusiaata tusagassiorfinnit innersuussutigineqarluartartup tamassumunnga takussutissaavoq, nangilluni allappoq.

Nalunaarutinut sukkanerusumik qisuariartarneq
Pissutsit alianartut iluarsiniarlugit inatsit meeqqat pisinnaatitaaffiinik nukittorsaallunilu kommunip periarfissaat pitsanngorsarneqassapput aamma kommunit pisussaaffimminnut naammassinninngissagaluarpata iliuuseqarsinnaanermut periarfissat nukittorsarneqarnissaanut arlalinnik imaqarpoq.

- Meeqqat pillugit isumaginnittoqarnikkut isumannaallisaanerit matumani inatsisissatut siunnersuutikkut nukittunerulissapput, meeqqallu pisortat ingerlatsinerannut tatiginninnerat qulakkeerneqassalluni, saqqummiussinermi tamanna allaqqavoq.

Aalajangersakkami ilaasut ilagaat, paarsinerluttoqarneranut imaluunniit kinguaassiuutitigut atornerluinermik pasilliinernik nalunaaruteqartoqarnera. Kommuninut piumasaqaatit taakkununnga sakkortuumik sukaterneqarput.

- Aalajangersakkami naqissuserneqarpoq, nalunaarutiginninneq iliuutsinut sakkortuunut tunngasimappat, soorlu paarsinerluttoqarsimappat, persuttaasoqarluni aamma kinguaassiuutitigut atornerluineq, taava kommunalbestyrelse pisussaavoq isumaginninnikkut misissuinermik piaarnerpaamik aallartitsissaluni imaluunniit ullut suliffiusut pingasut qaangiutsinnagit, inatsisissatut siunnersuummi allaqqavoq.

Taamaattoqartillugu kommuni politiinut erngerluni politiinut nalunaarutiginnittassaaq.

Nalunaarutinut kinguaassiuutitigut atornerluinerunngitsunut, kommuni aamma sukkasuumik qisuariartassaq. Isumaginninnikkut misissuisoqassanersoq ullut tallimat ingerlanerini aalajangerneqartassaaq.

Kommunit kiffaanngissuseqarnerussasut
Illuanik kommunit siusinaarlutik pitsaaliunissamut periarfissagissaarnerulissapput, kiisalu meeqqanut ataasiakkaanut periusissamik pilersaarusiorsinnaallutik.

- Kommunit sumiiffigisami pitsaanerpaamik meeqqanut ataasiakkaanut tapersiinissamik kiffaanngissuseqarnerusumik neqerooruteqarsinnaalissaaq, kisiannili aamma malitsigisaanik pisussaaffilerneqassalluni, saqqummiussassami tamanna allaqqavoq.

Tamatuma saniatigut oqartussaaffinni assigiinngitsuni akisussaaffik qanoq agguataarneqarnersoq inatsisip ersarinnerulersippaa.

- Meeqqat pisinnaatitaaffiisa aamma ingerlatsiviit pisinnaatitaaffiisa pisussaaffiisalu ersarinnerulersinneqarnerisigut ilaatigut siunnersuut isumaginnittoqarnikkut ingerlatsivimmi nutaaliaasumi pikkorissuseqartumillu sunniuteqarluartumik sakkussaqarnissaa qulakkeerneqassaaq, saqqummiussassami allaqqavoq.