Sangusaartartoq aappassaa VM-imut peqataalersoq

Kalaaleq sisorartartoq 20-nik ukiulik, Nuunu Chemnitz Berthelsen Nuummeersoq, sangusaarluni nunarsuarmi pissartanngorniunnernut aappassaanik peqataassaaq.

Taassuma illoqarfimmi Brunicomi Italiamiusut oqalunneq ilinnialeruttorpaa, tassanilu aamma sungiusarluartarpoq.

- Ullut tamaasa sisoraatinik akunnerit pingasut sungiusartarpunga, tamatumalu saniatigut timigissarlutalu arpattarpugut, Nuunu Chemnitz Berthelsen Sermitsiaq.AG-mut oqarpoq.

Nuunu Chemnitz Bertelsen aggustimili nunanut arlalinnut sungiusariarluni unammiarlunilu angalasimavoq. New Zealand, Litauen, Østrig aamma Italia angalaffigisimavai.

Atuaruk: Sisupiloortartoq VM-eqataareernermi kingorna: Peqataaninni ilikkagaqarluarpunga

Siuariarneq annertooq
Siorna unamminerit inernerisa katinneranni nunarsuarmi pissartanngorniunnermi 61-itut inissippoq, taanna USA-mi Vailimi pivoq, tamannalu ilinniutigisimaqaa.

- VM-ernerup kingorna pitsaanerulernissannut annertuumik piumassusinippunga. Maannalu nukittunerullungalu misilittagaqarnerulerpunga. Timikkut tarnikkullu maanna aalajaannerulerlnga malugaara, Nuunu Chemnitz Berthelsen erseqqissaavoq.

Atuaruk: Nuunu siuariarujussuartoq

Nuannisarnissaq siunertaasoq
Inuusuttoq sisorartartoq pitsaanerpaatut inissinniarluni VM-eriarnianngilaq.

- Nuannisarnissara aamma sungiusartarnittut VM-imi ingerlanissara uannut pingaarnerpaavoq. Kisianni siunissami nunarsuarmi pitsaanerpaat 30-it akornanniikkusuppunga, Nuunu Chemnitz Berthelsen oqarpoq, taanna sangusaarnermi sangusaapiloornermilu nunarsuarmi pissartanngorniunnermut peqataassaaq.

Sangusaarluni VM-erneq februaarimi St. Moritzimi Schweizimi pissaaq.