Tamaviat
Nuunu siuariarujussuartoq
Sangusaartartoq Nuummeersoq Nuunu Chemnitz Berthelsen nunanit tamalaaneersut unammineranni siuariarujussuarpoq
Italiami illoqarfimmi Passo Monte Croce FIS-imi unamminermi 93-inik peqataaffigineqartumi 19-inik ukiulik Nuunu Chemnitz Berthelsen kusanartumik angusaqarluni normu 24-inngorpoq.
Sangusaarnermik unammineq ataasinngornermi decembarip 7-anni ingerlanneqarpoq, tassanilu Nuunu Chemnitz Berthelsen siullermik sisunermini angusarissaaqaaq.
Nuunu Chemnitz Berthelsen sisunerup siulliup kingorna normu 13-itut inissisimavoq, ajugaasumit sekundinik marluinnarnik kigaannerulluni, atorsimallugit 48,74 sekundit. FIS-imi unamminermi FIS-punktinik tunniussisoqartarpoq, FIS-punktinik sapinngisamik ikinnerpaanik pissarsiniassalluni. Nuuni Chemnitz Berthelsen Italiami unamminermi 82,99 FIS-punktinnappoq.
Aggustimi FIS-imi unamminermut sanilliullugu siuariarpoq, taamanikkut Zew Zealandimi pissartanngorniunnermi FIS-punktinik 99,19-inik pissarsigam.
Nuunu Chemnitz Berthelsen marlunngormat decembarip 8-anni FIS-imi unammeqqippoq, tassani peqataasunit 91-init sangusaarluni sisunerup siulliup kingorna normu 14-iulluni. Ajoraluartumik aappassaanik sisunermini kukkulluni uniinnarpoq.
Nuunu Chemnitz Berthelsen sisorartartut allat 25-t nunanit allaneersut, soorlu Estlandimit, Brasiliamit Ruslandimillu, peqatigalugit sungiusarfimmiippoq, decembarip 19-ianni juullimi feriarluni Nuummukannginnermini. Nuummulli aallannginnermini FIS-imi unamminermi allami peqataaqqaassaaq.