Sakkutooqarfiup sakkutuuiarnerit Nunatsinnut tikeraarpaat

Forsvarets Veterancenter (sakkutuuiarnernik sullissivik, aaqq.) sapaatip-akunnerini makkunani Nunatsinni Savalimmiunilu sakkutuuiarnerit atugaat misissorlugit tikeraarput. Issittumi Sakkutooqarfik taama ilisimatitsivoq.

Misissuineq
Naalagaaffeqatigiinneq tamakkerlugu sullissineq iluatsinnersoq qulakkeerniarlugu sakkutuuiarnerit qulaajarneqarneqarnerat, danskit naalagaaffiata misissuinerata tunuliaqutaraa.

Atuaruk: Kalaaleq sakkutooq Afghanistanini sorsoqataasoq sassarpoq

Sakkutooqarfinni tarnip pissusaannik ilisimasallit suliffeqarnermullu siunnersortit sapaatip-akunnerani 43-mi Nunatsinnut Savalimmiunullu angalapput, sakkutuuiarnerit naapinniarlugit.

Aporfiit
- Sakkutuuiarnerit aallaqqaammut naapikkusuppagut, paaserusullugu Veterancenterip sakkutuuiarnernut tapersersuinissamik neqeroorutaanik atuinissaannut aporfissaqarnersoq, oberstløjtnant, Kristian Malver, Veterancenterimeersoq Forsvaret.dk naapertorlugu taama oqarpoq.

Atuaruk: Afghanistan kalaallit isaannit takullugu

Sakkutuuiarnernik naapitsinerup saniatigut aamma workshopertitsisoqassaaq, illersornissamut ministereqarfimmi, kommunini peqqinnissaqarfimmilu suliamut ilisimasallit nunani marlunni pineqartuni sakkutuuiarnerit atugaannik eqqartuissallutik.

- Sakkutuuiarnernik sullissinerup Kalaallit Nunaanni Savalimmiunilu najukkami pissutsinut naleqqussarlugu 2017-ip naanerani ingerlanneqalernissaa anguniagaavoq, Kristian Malver ilanngullugu oqarpoq.

Folketingimi oqallisigineqarsimasut
Kalaallit savalimmiormiullu sakkutuut nunani allani suliartoqataasarnikuupput, assersuutigalugu Afghanistanimi sorsunnermi aamma Somaliap imartaani ujajaasunik tigusarinninniarnerni.

Veterancenterip iliuuseqarnerat savalimmiormiunut iluaqutaannginnera misissuinerup takutinnerata kingorna, sakkutuuiarnerit siornatigut Folketingimi oqallisigineqartareerput.