Kalaaleq sakkutooq Afghanistanini sorsoqataasoq sassarpoq
Kalaaleq Livgardenimi sakkutooq, siorna Afghanistanimut aallartitaasoq maanna sassarterpoq.
Ateqarpoq Johan Høeg Hansen. Upernaarlu Afghanistanimit angerlareerluni ullumikkut Qaasuitsup Kommuniani upalungaarsimanermut pisortaavoq.
Johan Høeg Hansen aallartitaanini pillugu decembarimi sivisunerusumik Sermitsiami apeqqarissaarneqarpoq, tassani erseqqissaatigalugu qallunaat nunami tassani sakkutuulersornerat illersorlugu. Allaaserisami atuarneqarsinnaasutut sakkutuup aqqa allanngortinneqarsimavoq, Johan Høeg Hansenip ilaqutaanik siooraasaarisoqaratarsinnaammat.
Angerlarnermi kingorna piffissaq sivisujaaq ingerlareersorlu sakkutuujusimasoq sassarniarluni aalajangerpoq.
- Isumaqarsimavunga sassanngikkaanni uppernarunnaarnartoq. Taamatut aalajangersimavunga pissutigalugu angerlareerlunga nalilerakku sioorasaarneqarnissamut ulorianartorsiorneq annikitsuararsuusoq. Pingaartumik sakkutuut aallartinneqartussat suli aallannginneranni ilaqutaat sioorasaarneqartarsimapput, aallarnissaat unitsinniarlugu, Johan Høeg Hansen oqarpoq.
Maannakkorpiaq qallunaat Afghanistanimiinnerat tamanut ammasumik oqallisigineqarpoq filmimut piviusulersaarummut Amardillo-mut atsatillugu. Tassanili pineqarput sakkutuut Johan Høeg Hansenip sakkutooqataasa taarsersimasaat.
Filmimut piviusulersaarummut atatillugu oqaaseq "toqutsineq" atorneqarpoq. Tamannalu oqallitsitsilerpoq. Johan Høeg Hansenip tamatumunnga atatillugu erseqqissarpaa Talebanimi sorsuttartut toqunneqarsimanerat ilisarisinnaanagu.
- Afghanistanimi sakkutuut akornanni oqaatsit sakkortuut atorneqartarput, sammisaqarfinni allarpassuarnisut. Malittarisassalli sorsunnermi atuuttut malippavut, Johan Høeg Hansen oqarpoq.