Saattuaqassuseq appasittumiittuarsinnarpoq

Qeqertarsuup Tunuata, Uummannap Sisimiullu eqqaanni saattuaqassuseq suli appasittuarsinnarpoq.

Taamaammat Pinngortitaleriffiup biologii isumaqarput Qeqertarsuup Tunuani 2015-imi saattuartarineqartussat 400 tonsit sinnertariaqanngikkaluaraat, tamannalu siorna innersuussutinut sanilliullugu 200 tonsinik appariarneruvoq.

- Siunnersuinermut tunngaviuvoq saattuuanik inerissimasunik peqassuseq appariartuinnarmat aammalu saattuaaqqanik siunissami aalisarneqarumaalersussanik taakkussuuttoqarpiannginnera, Pinngortitaleriffik tusagassiuutinut taama allappoq.

Atuaruk: Ataatsimiisitaliap raajartassat ikilinerat ernummatigaa

Sisimiut allannguuteqanngillat
Sisimiut eqqaanni sinerissap qanittuanut avataanullu pisassiissutigineqarsinnaasutut innersuussutit allannguuteqanngillat. Avataani saattuarniartarneq suli matoqqagallartineqartariaqaraluarpoq, tamaanimi suli saattuaqarpianngimmat. Sinerissap qanittuanut pisassiissutigineqarsinnaasutut innersuussutit allannguuteqanngillat.

Nuup Paamiullu akornanni saattuaqassuseq aalaakkaasumik inissisimavoq, taamaattumillu innersuussutaasut allannguuteqanngillat. Paamiut eqqaanni sinerissap qanittuanut 200 tonsit avataanullu 1.000 tonsit saattuartassiissutigineqarsinnaasut innersuussutigineqarput.

Qaammatit tallimat aalisartoqartoquvaat
Pinngortitaleriffiup ilanngullugu aamma innersuussutigaa qaammatit saattuarniarfiusartut marsimiit juulimuusariaqaraluartut, taamaaliornikkut qituttunik qalerualinnik avammut eqqaaginnartarneq ingalassimatinneqarsinnaassagaluarmat. Taamaaliortoqaraluarpammi saattuanik nutaanik siunissami aalisarneqarsinnaalersussanik pilersuineq qulakkeerneqassagaluarpoq, taamaalillunilu atorluaanerusoqalissagaluarluni.

Saattuartassiissutigineqarsinnaasut pillugit siunnersuinerit ukiut allortarlugit pisarput, ukiumoortumillu misissuinertigut malunnaatilimmik allanngortoqarsimaneranik paasisaqartoqarpat siunnersuineq nalimmassarneqarsinnaavoq.

Saattuarniarneq iluanaarutaanerpaavoq 2001-imi, taamani pisat katillugit 1.500 tonsit missaanniimmata. Taamanerniilli pisat ikiliartorsimapput siornalu pisarineqartut katillugit 2.000 tonsit missaanniipput.