Ataatsimiisitaliap raajartassat ikilinerat ernummatigaa

Naalakkersuisut decembarip 30-ani aalajangiuppaat Kitaani raajartassat 2015-imut 73.000 tonsiussasut.

Raajartassallu ikilinerat Inatsisartut aalisarnermut ataatsimiisitaliaanit ernumanartoqartinneqarpoq.

- Annikilleriaat inuussutissarsiummut qanoq kinguneqassanersoq ataatsimiititaliamit ernummatigineqarpoq. Raajartassat taama annertutigisumik ikileriarnerat suliassaqartitsinermut aammalu tunisassiorfiit atuuttut attatiinnarneqarnissaannut periarfissamut sunniuteqarnissaat aarleqqutigineqarpoq, tamannalu ataatsimut isigalugu inuppassuit ulluinnarni raajarniarnermik raajanilluunniit suliareqqiinermik inuussutissarsiuteqartut aningaasaqarnerannik qajannarsisitsissaaq.

Ataatsimiisitaliap siulittaasua, Nikolaj Jeremiassen, tusagassiuutinut nalunaarummini allappoq.

Jeremiassen: Biologit naliliinerat allaanersusoq
Nikolaj Jeremiassen nangilluni allappoq uumasoqassutsimik ilisimasallit siunnersuinerat tusaanngitsuusaanngitsuusaarneqarsinnaanngitsoq. Kisianni:

- Kalaallit Nunaata kitaani raajat MSC-mit nalunaaqutsersorneqartarnerata attatiinnarneqarnissaa inuussutissarsiummut Kalaallit Nunaannullu tamarmut pingaaruteqarpoq. Ataatsimiititaliamilli oqaatigineqassaaq uumasoqassutsimik ilisimasallit siunnersuinerat raajarniat raajartassat annertussusiannik siammasissusiannillu naliliinerannit allaanerummat.

Aalisartut naliliinerat ilaatikkusunneqartoq
Pinngortitaleriffimmit nunatta kitaani 2015-imut raajartassiinissamut 60.000 tonsit pisarineqarsinnaaneri siunnersuutigineqaraluarpoq. Kisianni Naalakkersuisut 73.000 tonsinik decembarip 30-ani pisassiiniarlutik aalajangerput.

- Taamaattumik aalisartut misilittagaasa ilisimasaasalu ullumikkornit annertunerusumik siunissami ilaatinneqartarnissaat pingaaruteqartoq ataatsimiititaliaq isumaqarpoq. Tassunga atatillugu naalakkersuisooqatigiinnissamik isumaqatigiissut ataatsimiititaliamit nuannaarutigineqarpoq, tassani allassimammat Naalakkersuisut kissaatigigaat ‘uumasoqassutsimik ilisimasallit aalisartullu naligiimmik toqqammavigineqassassasut, pingaartumik pisassiissutissat aalajangersarneqarnerini’, Jeremiassen allappoq.

Kruse apersorniarlugu aggersarpaat
Taamaattumik maannakkut inissisimaneq assut ilungersunartutut ataatsimiititaliamit isigineqarpoq.

- Ukioq 2015 raajarniarnermik inuussutissarsiuteqartunut ajornartorsiorfiussasoq qularnanngilaq. Taamaattumik raajartassat annikilleriarujussuarnerat oqallisiginiarlugu Aalisarnermut, Piniarnermut Nunalerinermullu Naalakkersuisoq apersorneqarnissamut aggersarneqassasoq ataatsimiititaliamit aalajangerneqarpoq, Nikolaj Jeremiassen allappoq.