Akerliussutsimik takutitsineq
Ruth Heilmannip meeqqat akerlioqataatinneqarnerat tupaallaatigigaa
Siumumi ilaasortap, Ruth Heilmannip, meerarpassuit Naalakkersuisunut akerliussutsimik takutitseqataanerat tupaqqassutigaa. Naak, meeqqat nunami maani illersorneqarnerat?, aperivoq
Sermitsiaq.AG-p arlaleriarluni allaaserisareersimasaatut Naalakkersuisunut septembarip 30-ani akerliussutsimik takutitsineq, najuussimasut oqaluttuarnerattut, sakkortuumik ingerlanneqarpoq. Ilaatigut meeqqat meeqqerivinneersut akerliussutsimik takutitseqataasimasut eqqaaneqarluni.
Siumut sinnerlugu Inatsisartuni ilaasortap, Ruth Heilmannip, akerliussutsimik takutitsinissaq nalunaarutigineqarsimasoq ilisimavaa, taassumali tupaallaatiginerpaavaa meeqqat akerliussutsimik takutitseqataammata.
- Oqaluffimmit anillakkatta annilaarnarnerpaatut isigisara tassaavoq meerarpassuit akerliussutsimut takutitsinermut peqataatinneqarnerat takullugu qanoq annertutigisoq. Eqqarsaatigali siulleq tassaavoq meerartatta illersorneqarnerat atorunnaarami?, Ruth Heilmann tupassimasoq oqarpoq, nangillunilu:
- Naak, meeqqanut illersuisoq? Paasitinneqarpungalu taanna akerliussutsimik takutitsinermi aamma peqataasimasoq, tamanna annilaarnarpoq eqqarsarnartoqarlunilu. Nalunngilara meeqqanut sullivinni suungaluartuni meeqqat 18-nit inorlugit ukiullit politikkikkut sunnerniarneqartassanngitsut, kisianni meeqqanut perorsaaneq ilinniartitsinerlu pitsaasoq toqqissisimanartorlu tunngavigalugu sullinneqartussaasut, Ruth Heilmann oqarpoq.
Aaqqissuisut inersimasunut aaqqissuipput
Akerliussutsimik takutitsinermut aaqqissuisunit, Facebookimi gruppimeersumit 'Demonstration imod Naalakkersuisut - Naalakkersuisunut akerliussutsimik takutitsineq', aaqqissueqataasup, Naja Carina Steenholdtip, Ruth Heilmannip uparuaanera toqqissisimasumik tiguaa.
- Eqqissisimasumik akerliussutsimik takutitsisoqarnissaanut kaammattuivugut. Kikkut tamarmik tikilluaqqusaapput. Aamma kiap kina ilagineraa, inuup nammineq akisussaaffigivaa, Naja Carina Steenholdt, Sermitsiaq.AG-mut oqarpoq.
Taassuma ilanngullugu erseqqissaatigaa akerliussutsimik takutitsinermi qinersisinnaasut pineqarmata.
- Qinerseqqittoqarnissaanik piumasaqarpugut, tassani qinersisinnaasut saaffigalutigit, Naja Carina Steenholdt, oqarpoq.
Sermitsiaq.AG-ip meeqqat illersuisuat, Aaja Chemnitz Larsen, oqaaseqartinniarpaa.
Atuaruk: Aleqa: Akerliussutsimik takutitsisut sakkortungaarmata isumaqarlunga aallaaneqalerlunga
Atuaruk: Akerliussutsimut takutitsinermut aaqqissuisoq: Peqqissimissuteqanngilagut
Atuaruk: Assilisaq: Ukioq manna assilisani torrallataanerpaaq?