Nuuk
Assilisaq: Ukioq manna assilisani torrallataanerpaaq?
Akerliussutsimik takutitsisoqarnerani Aleqa Hammondip sikinganerata takutippaa qanoq tatisimaneqartiginersoq
Assi ataaseq oqaluttuarsinnaasartorujussuuvoq. Tamanna aamma Aleqa Hammondimik assilisaq qulaani takuneqarsinnaasoq soorlu aamma taamaattoq.
Naalakkersuisunut Inatsisartunullu akerliussutsimik takutitsisoqarnerani assilineqarpoq marlunngormat.
Nuummeersup Lasse Nymand Petersenip assiliisuuvoq, assilu nuannaarutigalugu oqaatigaa.
- Akerliussutsimik takutitsineq qanoq ingerlanneqarnersoq takuneqarsinnaavoq. Aleqa annertuumik tatisimaneqarpasippoq. Inuppassuarnit nilliaffigineqarneq Aleqamut nuannernavianngilaq.
- Inuk taama tatineqarsimatigisoq takullugu soorunami nuanninngilaq, kisianni assilisara nuannaarutigeqaara. Tassa assiliisarnerup oqariartuutaa. Tuapannguit tungaanukartumut aqqusinermit assilivara, Lasse Nymand Sermitsiaq.AG-mut oqaluttuarpoq.
Aleqa Hammondip misigisani oqaluttuaraa
Akerliussutsimik takutitsisoqarnera annertuumik inuttut sunniuteqarsimasoq Aleqa Hammondip oqaluttuaraa.
- Ilumoorlunga unneqqarillungalu oqassuunga akerliussutsimik takutitsisut sakkortungaarmata isumaqarlunga aallaaneqalerlunga, unatarneqalerlunga imaluunniit toqunneqalerlunga. Eqqarsaatit pigisakka ilissinnut apuuppakka annittariaqarakkit, Aleqa Hammond Facebookimi quppernermini sisamanngormat allappoq.