Royal Greenland peqqumaasiviup ulikkaarnera pissutigalugu angerlartitsisariaqarsimasoq

Umiarsuup Atammimmiit nassiussassanik assartuisussap kinguaattooqattaarnera pissutigalugu Royal Greenlandip Atammimmi tunisassiorfiata quia qerititsiviutigisoq qaammammi matumani siusinnerusukkut ulikkaaqqasimasoq Royal Greenland paasissutissiivoq.

Kinguaattoortoqarnerata kinguneranik suliffeqarfik saarullinnik killilimmik tigooraasariaqarsimavoq, tamannalu piffissami ullunik qulinik sivisussusilimmi nalinginnaasumik sulisorineqartartut 20-ugaluartut sisamaannaat sulisinneqarnerannik nassataqarsimalluni.

Arlaleriarluni kinguartitsisoqartoq

- Royal Arctic Linep umiarsua assartuisussaq Atammimmukartussaq kinguaattooqattaarmat tunisassiorfitsinni qui qerititsiviutigisoq ulikkaarmat saarullinnik killilimmik tigooraavugut, Atammimmi Royal Greenlandip tunitsiviani aqutsisoq Erik Hendriksen, Royal Greenlandip nittartagaanut oqarpoq.

Royal Arctic Linep umiarsuaataa assartuut kinguaattooqattaarmat Atammimmi Royal Greenlandip tunisassiorfiani karsersuit ninngusuut – scantainerinik taaneqartartut 23-t assartugassat uninngasuutigineqarsimapput, tunisassiorfillu inissakimmat saarullinnik tigooraaneq killilersorneqarluni.

- Tunisassiorfimmi sulisut nalinginnaasumik 20-t missaaniittut sulisorineqartarput, queeqqattali qerititsiviutigisup ulikkaaqqanera pissutaalluni suliassaqarpallaarnikuunngilagut, ullullu qulit kingulliit sulisut sisamaannaat sulisoraavut, Erik Hendriksen oqarpoq.

Aaqqiissutaagallartoq

Atammimmi tunisassiorfimmi queeqqami qerititsiviutigisumi scantainerit aqqanillit inissaqartarput, qerititsivilli inissaarummat scantainerit sinneruttut aqqaneq-marluk eqqortumik uninngasuutiginiarlugit iliuuseqartariaqarsimallutik.

- Queerarput qerititsiviutigisoq inissaarummat containeri 20 fodsi queeqqatut atortariaqalerparput, Erik Hendriksen oqarpoq.

Atorsinnaanngikkallartoq

Atammimmi tunisassiorfimmi sikuliorfiup atorsinnaanngikkallarnera sulinermut aamma unikaallatitsisimavoq. Erik Hendriksenip oqaatigaa iluarsaasussat tikereermata ulluni qaninnerni sikuliorfik aaqqineqassasoq naatsorsuutigalugu.

Royal Arctic Linep umiarsuaa assartuut pingasunngornermi septembarip 23-ani assartugassanik Atammimmut aallereermat Atammimmi Royal Greenlandip tunitsivianut tunisineq nalinginaasumik ingerlaqqilerpoq.

Aamma atuaruk: Royal Greenland saarullinnik tunitsiveqarfinnik arfineq-marlunnik siunniussisoq