Aalisarneq
Royal Greenland saarullinnik tunitsiveqarfinnik arfineq-marlunnik siunniussisoq
Kisianni Atammimmiunngitsoq, nunami tunisassiorfiup tunisisarnermut malinnaaffigisinnaanngisaani, aalisartullu Nuummik suleqateqarfigisariaqagaanni
Atammimmi aalisartut tunitsiveqarnikkut pissutsit pitsanngorsaavigineqarnissaat naatsorsuutigissanngilaat,
Royal Greenlandip Nuummi suliffissuup suleqatiginissaanik neqeroorfigai. Tamanna Sermitsiami allaaserisami atuarneqarsinnaavoq.
Atammimmillu assersuusiaq Royal Greenland tunisisinnaanermik annertusaasinnaassappat, pissutsit assigiinngitsut iluatsittariaqarnerannut takussutissaavoq, Royal Greenlandimi pisortaq Jens K. Lyberth aviisimut paasissutissiivoq.
– Tunisassiorfiit illoqarfinni nunaqarfinnilu tunisassiassanik aalisarfiulluartussatut, tunitsivimmi suliarinnittussanik sulisussarsiffiusinnaasutut ilimanaateqarnerusut annertuleriffigaavut – taamalu aamma atortorissaarutinut, soorlu innaallagissamut, imermut kiassarnermullu annertunersumik aningaasaliivigineqarnissamut pisariaqartitsinngitsut, Jens K. Lyberth oqarpoq.
Illoqarfinnilu nunaqarfinnilu arfineq-marlunni pissutsit taakku atuupput, Royal Greenlandillu Narsami, Paamiuni, Qeqertarsuatsiaani, Nuummi, Maniitsumi, Sisimiuni Kangaatsiamilu saarullinnik tunisassiornissaq siunniuteqqavaa.
Sermitsiaq tamatuma saniatigut allappoq, biologit innersuussutaasa Naalakkersuisullu pisassiissutaasa nikinganerat oqallinnermik pilersitsisoq.
Aviisi saarullinniarneq pillugu atuartartut allaaserisaannik annertujaanik marlunnik ilanngussaqarpoq. Ataaseq Pinngortitaleriffiup nunatsinni saarulleqatigiiaat assigiinngitsut pillugit allaaserisaa, sooq mianersuussisariaqarnermik nassuiaassisoq. Aappaalu Sustainable Fisheries Greenlandimeersup Peder Munk Pedersenip allaaserisaa, taannalu Kalaallit Nunaata Islandillu saarullia pillugu ataatsimoorussamik aqutsinissamut pilersaarusiortoqarnissaanik kaammattuuteqarpoq. Saarulliit Kalaallit Nunaanni neriniartarput Islandimili pisarineqartarlutik, maluginiakkani tunngavigalugit oqarpoq.
Saarullinniarneq pillugu annertunerusumik atuarusukkuit Sermitsiaq maani pisiarisinnaavat.
Aviisimi avaleraasartoorniarneq suli kinguaattooqqasoq Royal Greenlandilu ukioq manna avaleraasartoorniarnermut aalisartunik amigaateqaqqittoq aamma allaaserineqarput.