RAL: Uulia kinertoq pillugu peqateqarani pinaveersaarneqarli
Uuliap kinertup umiarsuit angallanneranni inerteqqutaalersinnaanera nunat tamalaat isumaqatigiissuteqarnerisigut pisariaqarpoq, Royal Arctic Line taama oqariartuuteqarpoq.
Dieseli ikummatissaq oqimaatsoq Issittumi umiarsuarmi angalanermi inerteqqutaalernissaa Naalakkersuisut sulissutiginiarpaat. Tamanna FN-ip nunani tamalaani imarsiornermut suliniaqatigiiffia IMO aqqutigalugu pissaaq.
Uuliamik kinertumik (HFO)-mik inerteqquteqalerneq IMO-p sinaakkusiineranik pinissaa pingaaruteqartoq, Royal Arctic Line oqariartuuteqarpoq.
- Ikummatissaq kinertoq pillugu oqallinneq nunanit tamalaani oqallisigineqarnissaa pingaaruteqarpoq, taamaalilluni nunarsuup sinnerani akikinnerusumik mingutsitsinerusumillu angalaneranni Nunatsinni kisimi aningaasartuutinik amerlititsisumik akuersissuteqartoqassanngimmat. Nunarsuaq tamakkerlugu 20.000 aamma 30.000 tungaannut umiarsuit HFO-mik ikummateqartarput – uagut tallimaannaat pigaagut. Taamaattumik IMO-mit aalajangiisoqarnissaa utaqqineqartariaqarpoq, taanna 2020-mi pissaaq, RAL-ip pisortaa, Verner Hammeken Sermitsiaq.AG-mut oqarpoq.
Tassami uulia kinertoq uuliamit oqinnerusumit mingutsitsinnginnerusumillu akikinnerujussuuvoq.
- HFO Kalaallit Nunaanni kisiat inerteqqutaalersissagaanni equngasoqassaaq.
Ikummatissaq kinertoq marlunnik ajornartorsiuteqarpoq. Ilaatigut silaannarmik tappiorannartunik annertuumik mingutsitsisarpoq, tamannalu peqqissutsimut aamma avatangiisinut ulorianarpoq.
Kisianni tamatuma saniatigut ingammik Issittumi uuliakoortoqarnerani ajornartorsiortitsisarpoq. Nillernerata issittumi pinngortitamit qajannartumit peeruminaallisittarmagu.
- HFO-p silaannaq mingutsittaraa qularutissaanngilaq, sumulluunniit angallatigigaanni mingutsitsiuarpoq. Immikkut ittumilli Issittumik ajornartorsiuteqarpoq, uuliakoortoqalissagaluarpat ajorluinnartumik kinguneqarsinnaavoq, tassami uulia katersoruminaannerugami. Taamaattumik nunani tamalaani aaqqiissuteqartoqarnissaa pingaaruteqarpoq.
Inerteqquteqalernerummi RAL-mi aningaasartuutit sunniuteqarfigissavai.
- Aningaasartuutissat naatsorsoqqissaarnikuunngilagut, uuliap akia aamma apeqqutaassammat. Kisianni maanna RAL-ip angallassineranut aningaasartuutit 5-8 procentimik qaffariartissagai eqqoriarparput, Verner Hammeken oqarpoq.
Naalakkersuisut killiliiniarnerannut tunngaviusumik RAL aamma taama inissisimavoq.
- FN-ip imarsiornermut suliniaqatigiiffia IMO aqqutigalugu Issittumi HFO-mik inerteqquteqalernissamut maleruagassat ilusilersorneqarnerisigut, Issittumi tamarmiusumi imaatigut angalanermi atugassarititaasut avatangiisinullu pitsaassuserisitassat qaffasissut assigiilernissaat qulakkeerisoqassaaq, Namminersorlutik Oqartussat taama oqariartuuteqarput.