Nunatta maanna uulia kinertoq inerteqqutaatilerniarpaa

FN-ip nunani tamalaani imarsiornermut suliniaqatigiiffiata IMO-p Issittumi HFO-mik atuinissamut assartuussinissamullu inerteqquteqalernissamik suliniuteqarnissamut Naalakkersuisut aalajangiussipput.

Inerteqquteqalernermik tapersiinerup Nunatsinnut qanoq akeqarnissaata misissoqqissaarneqarnera aalajangiiniarnermi utaqqineqarsimavoq.

Misissueqqissaarneq

HFO-p umiarsuarnut ingerlatitut atorneqarneranik inerteqquteqalerneq inuiaqatigiit aningaasaqarneranni ukiumut 8,1 millionit koruunit missaannik aningaasartuuteqarfiussasoq misissueqqissaarnerup takutippaa, tamanna tusagassiuutinut nalunaarummi atuarneqarsinnaavoq.

Avatangiisinut illersuiniaqatigiiffiit ukiorpassuarni uuliap kinertup umiarsuarni atugaanera inerteqqutaatilerniarlugu ilungersuuteqarnikuupput. Assersuutigalugu ikkarlinnermi uuliakoorneq immami nillertumi katersoruminaanneranik tamanna pissuteqarpoq, tamannalu avatangiisunut annertuumik kinguneqassammat.

Silaannarmik mingutsitsisoq

Aamma HFO-p umiarsuarnut ingerlatitut atorneqarnerani silaannaq mingutsinneqartarpoq aammalu aputit sermillu qaavi paap pujoralaanik qallerneqartarlutik. Aputit sermillu qaavi paaninnerminni taartikkaangata, sermeq sukkanerusumik aakkiartulertarpoq.

IMO-p imaani avatangiisinut illersuinermut ataatsimiititaliaa tullianik oktobarip qaammataani ataatsimiittussaavoq. Tassanerpiaq umiarsuit HFO-mik atuinerannut assartuussisarnerannullu inerteqquteqalernissaq oqallisigineqassaaq.

Nalunaarusiaq tamaat atuaruk: HFO-mik atuinissap inerteqqutigineqarsinnaanerani inuiaqatigiit aningaasaqarnerannut, avatangiisinut silallu pissusaanut sunniutaasussat

Powered by Labrador CMS