RAL 2014-mi sinneqartooruteqarpoq

Royal Arctic Line 2014-imi 36 million koruuninik sinneqartooruteqarpoq.

- Tamanna 2013-imut sanillullugu siuariarluarneruvoq, taamanikkummi ukioq 20 million koruuninik amigartooruteqarfiummat, Royal Arctic Line A/S-ip siulersuisuini siulittaasoq, Kuno Fencker, tusagassiuutinut nalunaaruteqarluni taama allappoq.

Siuariarneq pingasunik peqquteqartoq Royal Arctic Linemit ilisimatitsissutigineqarpoq. Tassalu aningaasartuutit ingerlaavartumik ingerlanneqartunut naleqqussarneqarsimapput, taamaaliornikkullu aaliangersimasumik aningaasartuutit 30 million koruuninik appartinneqarsimallutik.

Atuaruk: Umiarsuit assartuutit angalanissaannut pilersaarutit RAL-p allanngortippai

Angusat naammaginartutut nalilerneqarput
2014-imi martsip qaammataata aallartinneraniit assartuussinermut akit 5 procentinik qaffanneqarput, tamannalu aqqutigalugu kaaviiaartitat 22 million koruuninik amerlanerulerlutik.

Kisermaassilluni ingerlatsiviit avataanit kaaviaartitat 9 million koruunit missinginik amerleriarsimapput.

- Ikummatissap akikillineratigut ‘killormut ingerlanerup’ erniatigut assigisaatigullu aningaasartuutit ammut naqippai aammalu uuliamit nunallu allat aningaasaannut ilassutit ammut naqillugittaaq, Royal Arctic Linep siulersuisuini siulittaasoq allappoq.

Taamalilluni sinneqartoorutit akileraarut ilanngaatigina 36 million koruuniulerput, tassalu akileraareernerup kingorna sinneqartoorutit 24 million koruuniulerlutik.

2014-imi assartukkat nunatsinnut nunatsinniillu assartorneqartut katillutik 741.000 kubikmeteriupput 2013-imi taakku 747.000 kubikmeteriusimasut.

- Tamanna 0,8 procentimik annikilleriarneruvoq, tamakkiissumilli isigalugit assartukkat 2013-imisut ipajaaginnarlutik. Taamakkaluartoq assartukkat ukiut qulit iluini aatsaat taamak annikitsigipput, umiarsuaatileqatigiit taama allapput.

Atuaruk: Umiartortunik nunanit allamiunik atorfinitsitsinissani RAL-ip isumaliutigaa