sipaarniuteqarneq
Umiarsuit assartuutit angalanissaannut pilersaarutit RAL-p allanngortippai
Kitaani illoqarfinni nioqqutissat ulluinnarni atorneqartartut nunguttaleratarsinnaapput, Royal Arctic Linep umiarsuit assartuutit illoqarfinnut tikittarnissaat 2015-imi kvartalimi siullermi allanngortippagit
Nunatsinni illoqarfinni nioqqutissanik ulluinnarni atorneqartartunik pisiniarfiit 2015-imi kvartalimi siullermi periutsitik allanngortittariaqarpaat, nioqqutissat ullut tuniniarneqarfissaat killillit Aalborgimi nunatsinnut assartugassatut tunniukkaangamikkit. Royal Arctic Linep umiarsuit illoqarfinnut tikittarfii allanngortinniarpai, ullut arfineq-marlukkaartaraluarlutik 2015-imi januaarip aallaqqaataaniit marsip aallaqqaataanut nikerartumik ullut qulingiluakkaarlutik 12-ikkaarlutillu tikittitsittalerlugit.
Nassiussat ikiliartornerat allannguinermut pissutaavoq
Royal Arctic Line naapertorlugu allannguinermut pissutaavoq assartukkat ikiliartuinnarnerat pissutigalugu isertitaqartannginneq, tamannalu umiatrsuaatileqatigiiffiup aningaasaqarnera pitsanngorsarniarlugu pilersaarutip ilagaa.
– Kvatalimi siullermi assartukkat ukiup sinneranut sanillullugit tamatigut ikinneralaarsuusarput. Tassa imaappoq, Royal Arctic Linep umiarsuit usisinnaasaasa affaannai assartortarpai, tamannalu akisoorujussuuvoq, Royal Arctic Line allappoq.
Atlantikukkoortut 13-iniit arfineq-pingasunut ikilissapput
Royal Arctic Linep pilersaarutit allanngortinnerisigut kvartalimi siullermi umiarsuit atlantikukkoortinneqartussat 13-iniit arfineq-pingasunut ikiliniarpai.
– Taamaasilluni sipaaruteqangaatsiassaagut, pingaartumik umiarsuit orsussaasigut, Kalaallillu Nunaanniit Kalaallillu Nunaannut assartugassanut pisariaqartunut suli inissaqarluartassaaq, Royal Arctic Line allappoq.
– Umiarsuaatileqatigiiffiup aningaasaqarniarnera inuiaqatigiillu tamarmik aningaasaqarniarnerat isigalugu ingerlatavut ajoraluartumik naleqqussartariaqarpavut, taamaasillutalu aamma Kalaallit Nunaannik pilersuinikkut sullissineq, Royal Arctic Linemi aningaasarsiornermut pisortaq Niels Clemensen oqarpoq.
Inuinnaat allannguutit malugissanngilaat
Royal Arctic Line naapertorlugu atuisartut inuinnaat Royal Arctic Linemik nassiussigaangamik allannguutit maluginavianngilaat.
– Qularnanngilarli pisiniarfiit pilersuisullu, nioqqutissanik ulluni aalajangersimasuni tunniussinermik sungiussisimasut, allannguineq atuutilerpat unammilligassaqassasut - allaammi sapaatip akunnera allortarlugu allanngortartumik. Royal Arctic Linep nalunngilaa tamanna pitsaanerpaajunngitsoq, taamatulli sipaaruteqarnissaq pisariaqarpoq. Taamaattumik neriuppunga atuisartuvut anginerpaat peqatigalugit qaammatini aggersuni assartuinermi allannguutit atuutilersinnagit unammilligassat aaqqissinnaassallugit, taamaasilluni pisiniarfiit pisisartui eqqorneqaqqunagit, Niels Clemensen oqarpoq.